St. Mary Magdalene

St. Mary Magdalene nø matá nvng lazarúò àngnvmè ínø mvshvlamè cáng shvngøt lòng dvchøpmè wanø chømciqrì taq kèní shálúnshìe. Àngnø yudaq móng Betani rvgaq kèní íwe Galishimadala rvgaq taq lvpat vlíng vpo shìráìnø Makdala wanø vsvngrìí shá yàngà we íe. Kàngpè yesu nø parishé vsvng tiqgø íwe simonò chøm taq dørøm á:mpà vm dvgvp Maria madaklaí yesu hísvng necìí shølònø ngódorcìí mvpnòe. We lòng svng yàng bøa we simon nø gvzà shvná mvgør we ínigø yesuí àngó mvràrì shvngbe svng vroqa:ò we svng yàngbø:a dvgvp gvzà shóngshì bøì wanø shø:nòe. We mèpvng maria madaklanø yesuò cánshúrì kaq dvzømshìwe svmaré mvdò svng gòng yàngì. Tiqni rvtø taq Betani taq vlwe Lazarúò chømtaq yesu tuqráì dvgvp maria madaklanø chøm bvlìrì taqgø dvzøm mvwáshì we svng àngnvmè matáí Vkàngpèá, vnvm mèí nø ngà wāwā dvzømshi dèzv́r we svng mènøtna ma? Ngà svng dvbv̄nglv́m èv̄lāngà,” a:lòe. Vkàngpèí vtà:ngò nø, “Marta é, Marta é, nà nø bv̀nlì mvme luq rvt góng dègīshi nø shv̀mná mègø̀re.wanø Luka 10:49-41 taq yánglún shìe. Maria madaklanø yesu shì: ámì mèpvng dvgàm kèní zunbøìwe svng nvmlat yàng yàngà mègø íe. Mari nø lóngdùng dvgv̀m vdàm lapmø rip nø ngø̄e. Ang wedø ngø sórí ngúshì nø dvgv̀m vdòng svng dvjaqò nìnø, Yesu vnàng vyàla:pmà yv́ngø, belaq mùng gwashi we muqlàng dvzv́r vní gǿ nø, vgo lap tiq gǿ, hí lap tiq gǿ rung we svng yà:ngòe. Wegǿ níí ang svng, “Svmaré mèá, pàwá èngøe?” a:lòe. A:ngí angni svng, “Ngà Vkàngpè angmaqí baqò nø kayv́ng gv̀la:pmà we mvshángò rvt ngønge,” a:lòe. Wedø shø̀n dá:ngí ang lv́mposhì nìnø, Yesu weyv́ng rip we svng yv̀ng bǿà. Inìgø Yesu í we svng màmvshá:lò. Yesuí, “Svmaré mèá, pàwá èngøe? Nàí kagǿ svng èláòe?” a:lòe. Marií wepè nø kùlwàng vsòngpè íe lá:nò nø Ang svng, “Vshaq pèá, nàí Ang svng èbaqa:pmà nìnø, kayv́ng nàyàla:pmà we dètángà, ngàí baqlv́m íe,” a:lòe. Yesuí ang svng, “Mariá,” a:lòe. Ang lv́mposhi taqsórí Hebru kàí Ang svng, “Raboni,” a:lòe. Yakà nø, Svra pè, wa kà íe. Yesuí ang svng, “Ngà svng mèzø̀mànøng; kadø íe wani Ngà nø Vpè yv́ng svng shini màrvlv́ngshaq ǿngàe. Iwe Ngà vnvmrì svng èdivm nø angmaq svng, ‘Ngà nø, Ngà Vpè nvng namaq Angpè, Ngà Gvray nvng namaq Gvray yv́ng svng rvlv̀ngvme wae,’ èvlá:mò,” a:lòe. e Makdala Mari di ráì nø coqcv́nrì svng, Vkàngpè svng ngàí yv̀ng bǿngà, a:lòe. Vrá, A:ngí ang svng vl dá:ràrì shvngbe dvtáòe. Wanø maria madaklanò dang svng Yohán 20:11-18 taq yánglún shìe.