St. Mary Major

St. Mary Major
Noqngøm tøngnø
Roma myuq taq vlwe St. Mary Major noqngøm tøngnø nø Svrabín koqkámpè Sixtus III pè bat AD 435 nøng taq Councit of Ephesus mvsat tøngnø tiqlòng ku vrang yàngà we íe. We noqngøm tøngnø taqni shvnshér we chømyo vjøng mariq svng koqkám tiqmè ku shvgùn shvringwe wàlvm mvsat dvkám yàngà we gø íe. 
Yalòng nø Roma myuq taq àngmè mariq kaq shvgùn shvring nø núngshì we  nvmlat noqngøm tøngnø íwe rat Major wanø bøng zíshì yàngì we íe. Yesu àngmè mariqò dalvm nvmik gømlarì svng tvnùng we ku Our Lady of Snow wanø gø bøng zíshì we íe.
Shvngømré mvshølrì taq yánglún shìwe nø Yohán wa tøshì we lànglì tiqpè svng àngmè mariqí shøngran zíyàngà we taq àng dvpat shvrà tiq shvrà taq noqngøm tøngnø tiqlòng vrangā lvm dvkám yàngà wanøgø yánglún shìe. We noqngøm tøngnø vrang lvm shvrà taq dalvm dø íwe shvngør vkøn dvzvŕ nø nvmik gømla dvtan ráà we rat Svrabín koqkámpè Liberius bat AD 352 nøng taq Esquiline Hill wa tøò we shìgùng mvdàm ø we noqngøm tøngnø svng vrang pvng ráà we ínø mèpvng kaq AD 435 Svrabín koqkámpè Sixtus III pè bat taq vrang dvdáng nø shvmvn dvgøng yàngà. We noqngøm tøngnø vdòng taq kàngpè yesu gvlyàngà we rvtø taq àngsvng muq yàngà we raqwé svng gø rvdaò we svng yánglún shìe.

Add new comment

8 + 9 =