St. Matha

St. Martha 
St. Martha nø Mary Madvle nvng Lazarus ò àngnvm mè ínø Jerusalem wamà shvnvng Bethany myuq taq vl yàngì we gø íe. Kàngpè yesu nø àngnøng nvm kaq gvzà shóngshì weí àngmaq vlwe shvrà svng zaqlè ku mvme boq tuq yàngì we gø íe. Tiqni rvtø taq Martha nø àngmaq chøm taq tuqráì we zaqlè rì dvpat vm-aq lvm dvgøāò we rvtø Yesu kristuq shvnvngø rungnø kàdvmvnwe àngnvm mè kaqsvng nøt mvgør nøt zángshìe wae. Marta nø dvzøm bv̀nlì luq nø, nøt shok lú:ngì rvt Yesu yv́ng di nø yadø wae. “Vkàngpèá, vnvm mèí nø ngà wāwā dvzømshi dèzv́r we svng mènøtna ma? Ngà svng dvbv̄nglv́m èv̄lāngà,” a:lòe. 41 Vkàngpèí vtà:ngò nø, “Marta é, Marta é, nà nø bv̀nlì mvme luq rvt góng dègīshi nø shv̀mná mègø̀re. 42 Iwe zǿmdv̀ng lòng nø tiq pv̀n wa v̄le. Mari nø welòng rvcv̄ngshì bǿì. Welòng nø ang yv́ng kèní lúālv́m mø̀í,” a:lòe. wanø Luka lèga 10:40-41 taq uru yàngà we svng yánglún shìe. Lazaru zanø uesu vrá tiqkvt weyáng svng diwe dang Yohan 11:1-44 taq Wekvt Mari nvng angnv̄m mè Marta vl we Betani rvwá taq Lazaru tǿò we tiq pè zae. a 2 Mari nø Vkàngpè svng ngórdorcìí vdø̄:rò nø, Ang hí svng Ang vgonií shøqaò mè íe. Za pè Lazaru nø angnv̄mpè íe. b 3 Wervtnø̀ angnv̄m mèníí Yesu yv́ng svng vsvng dvzá:rò nø, “Vkàngpèá, èyà:ngò, Nà èshóngshi pè Lazaru nø zae,” a:lòe. 4 Iwe Yesuí tá bǿà kvt, “Za we yalòng nø shìlv́m høq nø mø̀í; Gvray Angcè pè ngø̀r dvgùng nvng Gvray ngø̀r dvgùng nø welòng taqkèní shvring lúnlv́m dvpvt lè íe,” a:lòe. c 5 Yesu nø Marta nvng angnv̄m mè ó Lazaru kaq shóngshie; 6 Lazaru za we tá bǿà nìgø Yesu nø wedøni weyv́ngø vní ni shini v̄le. 7 Wemèpvng A:ngí coqcv́nrì svng, “Yuda móng svng vrá tiq kvt dìì,” a:lòe. 8 Coqcv́nrìí Ang svng, “Rabbiá, Yuda vsvng rìí Nà svng cáyaq ni lú:ngì wvplv́m èwàa:pmì we, Nà nø vrá tiq kvt weyv́ng svng dìlv́m èwa ma?” a:lòe. d 9 Yesuí vtá:nò nø, “Tiq ni taq tiqcé vní nari vl we mø̀í ma? Vsvng nø vyá:ngí tvrà di nìnø, rvgaq gálòng taqkèní yvngshi rvt, ang màtøpshìvm. e 10 Inìgø yaqdø̀:ngí tvrà di gǿ nø, ang taq gálòng màvl rvtnø ang vtøpmvme,” a:lòe. f 11 Yadv́ng pv̀n shø̀:nò dá:ngí, angmaq svng vrá A:ngí, “Nøngmaq shóngshàì pè Lazaru yøpme. Ngàí ang svng dvshatlv́m dvpvt dønge,” a:lòe. g 12 Wervt coqcv́nrìí Ang svng “Vkàngpèá, ang nø yøp we í nìnø tv́n angwa vshat longe,” a:lòe. 13 Yesuí nø Lazaru shì we svng shø̀:nò we, angmaqí nø angwà yøp dø yøp we svng wae, lá:nòe. 14 Wervtnø̀ Yesuí angmaq svng dèdè chaqdvp dvtáò nø, “Lazaru nø shìapmì. 15 Ngà weyv́ngø màvlvp lòng nø namaq kv́mnøt té lúnlv́m dvpvt í rvtnø Ngà dvbònge. Akvt ang yv́ng svng dìì,” a:lòe. 16 Wekvt Didimu* tǿò pè Tomaí coqcv́nrì svng, “Ang nvng tiqdø shí nvngsvng nøngmaq gø dìì,” a:lòe. h
17 Yesu tuq á:mì kvt, lóngdùng dvgv̀m vdòngø Lazaru kǿ:mò we nø vbì ni ía:pmì we svng A:ngí shá bǿà. 18 Betani rvwá nø Yerusalem kèní tvné vní ming dv́ngte wa vrúme. 19 Yuda vsvng mvme nø angnv̄m pè rvtnø Marta nvng Mari svng nøt shvlø̀mlv́m dvpvt di dá:rì. 20 Yesu dì ráì we svng Martaí tá bǿà kvt, ang búngá:mì nø Yesu svng vtoá:mà. Mari nø chø̀mø̄ rúngdv̀ng wae. 21 Wekvt Martaí Yesu svng, “Vkàngpèá, Nà ya yv́ng èvlvp pa í nìnø, vnvmpè nø mvshì ni we íe. i 22 Iwe Gvray kaq Nàí kapà èrø:tnò nìnø, wepà Gvrayí Nà svng akvt ínìgø èzi daq we ngàí shángòe,” a:lòe. 23 Yesuí ang svng, “Nvnvmpè nø vrá zun longe,” a:lòe. 24 Martaí Ang svng, “Tìsi lv̀ngdø̀m zunlong ni taq ang vrá zun long we nø ngàí shángòe,” a:lòe. j 25 Yesuí ang svng, “Zunlòng nvng gø̀nshaq nø Ngà ǿngàe. Ngà kaq kv́m gǿ ang nø, shì nìgø wedøni zun longe. 26 Vrá, cúnshi nø Ngà kaq kv́m we kagǿ gø, kadvgvp gø mvshivm. Yalòng svng èkv́m ma?” a:lòe. k 27 Martaí Ang svng, “Íe, Vkàngpèá, Nà nø rvgaq tø̀m svng èdi daqì pè, Gvray Angcè Kristu wepè ni èí we svng ngà kv́m bǿngà,” a:lòe. l 28 Yadø shø̀n dá:ngí, ang vtvngá:mì nø, angnv̄m mè Mari svng mvyø̀:ní gōò nø, “Svrapè ya yv́ng vl nø, nà svng ègōe,” a:lòe. 29 Marií yakà tá bǿà kvt, ang tiqshaqí búng nø, Ang yv́ng svng dìá:mì. 30 Yesu nø rvwá vdòng svng shini mvgòng dø, Martaí Ang svng vtoa:tnà yv́ngø v́ldv̀ng wae. m 31 Wedvgvp chø̀mø̄ vl nø ang svng nøt shvlø̀:mò we Yuda vsvng rìí, Mari nø tiqdvshaqí búng nø dìá:mì we svng yv̀ng bǿà kvt, ang nø dvgv̀m yv́ngø ngǿlv́m dìá:mì lá:nò nø, ang mèpvng cà:nòe. 32 Yesu vl yv́ng Mari tuq ráì nø, Ang svng yv̀ng bǿà kvt, Ang hí yv́ngø kǿng kupshi sórí Ang svng, “Vkàng pèá, Nà ya yv́ngø èvlvp pa í nìnø, vnvmpè nø mvshìni we íe,” a:lòe. n 33 Ang ngø we nvng ang ó dì ráì we Yuda vsvng rì gø ngø we svng Yesuí yv̀ng bǿà kvt, Ang nøt vdòngø mvgø̀r nø nøt dvsha sórí, o 34 “Ang svng namaqí kayv́ngø èhùlvpshà ma?” a:lòe. Angmaqí, “Vkàngpèá, có, yv̀ngá:mì,” a:lòe. 35 Wekvt Yesu gø ngø̄e. p 36 Wervtnø̀ Yuda vsvng rì nø, “Eyv̀ngnøng, A:ngí ang svng kadvngshìni shòng dá:rà!” wae. 37 Iwe angmaq tiqmaqí nø, “Nemàn pè svng vne dvgv́raò we yapèí nø, Lazaru svng gø lamvshì dø wá lú:nò we mø̀í ma?” wae.
38 Vrá Yesu nø nøt vdòngø mvgø̀r sórí dvgv̀m svng tuq ráì. Dvgv̀m nø lóngdùng í nø, lóngkø̀:mí wa:mòe. q 39 Yesuí, “Lóngkø̀m gø̀m èlùnøng,” a:lòe. Shia:pmì pè angnv̄m mè Martaí nø Ang svng, “Vkàngpèá, ang shìapmì we vbì ni í ráì; akvt nø davngàvpni,” a:lòe. r 40 Yesuí ang svng, “Nà èkv́m nìnø Gvray ngø̀r dvgùng nàí èyv̀ng lú:ngòe, wvng nø nà svng màvl bǿngà ma?” a:lòe. s 41 Wekvt angmaqí lóng gø̀m lù bǿà. Yesu nø Ang vne muqlàng kaq dvjaq sórí, “Vpèá, Nàí Ngà kà ètángang bǿngà rvt Nà svng oqà. 42 Kadvgvp gø Nàí Ngà kà ètángangà we svng Ngà nø shángshø̀ng we, Nàí Ngà dèzv́r dakngà we svng gùrgùr rip we loksokrì angmaq kv́mlv́m rvtnø Ngà yadø shø̀n we íe,” wae. t 43 A:ngí kà yarì shø̀n bǿà dá:ngí, serwa vkiq nø, “Lazaruá, èléshì long,” a:lòe. 44 Wekvt shìapmì pè Lazaru nø, nàngmøq laqtuní hí wur vdøpshaq, ang mv́rdaq gø paqzí:tní vzvpshaq léshì lú:ngì. Yesuí angmaq svng, “Epǿnanøng nø ang svng shèlàngnøng,” a:lòe wanø vru yàngà we svng gø yánglún shìe.