St. Monica

St. Monica

St.Augustineò àngmè st. Monica nø AD 133 nø Africa dan Dagaste myoq taq gvl yàngà. Àngò shvlawe nøt yangwe nø cipshì sháò we nøt ratnø àngò døngkupè Patrishes svng gø màshvla we chàng laqyà kèní vlíng vpo dvzvŕ yàngà we íe. Àng shini lvpat mvbe rvtø tiqnøng vdòng taq tìlop kámshì nø Gvray kaq kámwe vsvng tiqgø bøn yàngì. Vzàng kaq àng mvnoq mvkám we tiq gø írat nø àngcèpè St. Augustine gø cáng noq we tiqpè íyàngì nø mvgam màshvla we tvràrì taq cvn we í døngku shvzøng shì nø àngcè tiq gø gvl yàngà. St. Monica nø àngcèpè St. Augustine kà mvta we írat nøt yøl we í á:maqvnvtshì nø vjúrøt dvzaqshì ráì. Ts. Augustine nø Italy móngdàn svng mvyøní búngá:mì mèpvng àngmè taq kèní Milan myoq høq shaq cvnònø dvhøm yàngà. We rvtø taq àngcèpè Augustine nø nøt língshì bøì we svng yàngbøà kat St. Monica nø vtangshaq dvbù yàngì. We mèpvng Africa móngdàn svng vtáng ráì dvgvp St. Monica nø záyàng gvbà vhøm yàngà. Àng gønshaq shi màle dvgvp shøn yàngì we taq ngà cúnshøngwe lvpat taq à tiq pvn gø nøt zøl lvm mvlúnnò ngà dèni høq shaq cúnshøng we nø àngcèpè St. Augustine svng Gvray kaq kám we vsvng tiqgø bøn lún lvm dvpat wa íe. Ngà shøng bøngwe mèpvng tiq lòng wa røt nímshì mvyønge we lòng nø Gvrayò kagvp núngwe shvrà taq ètuq-vm dvgvp ngàsvng dvdam lún lvm wa nø lvpshì yàngì. St. Monica nø àngò àng lvpat 55 nøng taq shìyàngì nø àngmè maq svng roqgvr we shvnshvŕ mè wanø dang yàngà. St. Augustine àngí vru yàngà we kàru taq vmè nø ngà dvpat rat nø rvtø àngnøng mvme necì vyø yàngì àng dvpat ngà tiq naricè ngøngwe nø shutshì we mvl wanø vru yàngà.