St. Patrick

St. Patrick
Ireland móngdàn taq kèní dvzvŕ pè St. Patrick nø AD 385 nøng taq British móngdàn taq shøq yàngà. Àng lvpat 17 nøng taqni àng svng vshuq tiqgø ku Ireland móngdàn svng nvmvm yàngà we íe.6 nøng køp zømwàngrì vdòng taq wa vl yàngì we ínø nøt mvsøn shèr we nvng kámnøt tvrà taq cúnshì yàngì. Wedø vshuq bat taq kèní lutshì lúnbøà mèpvng àngò rvgaq Ireland móngdàn svng loráì. Àngò rvgaq svng tuqráì dvgvp møni àngsvng dvbùshvng mòngkà dvshvng lvm dvkám we shøngran yøpnvng lún yàngà wae. AD 431 nøng taq kèní leris myuq taq vlwe mòngkà zùng taq gvray paqzí cvnshì yànì mèpvng àngsvng Ireland móngdàn svng vrá vtáng nø gvray bvnlì wàlvm dvzvŕ yàngà. 
Ireland móngdàn svng tuqvmì we tiqnøng vle vmì mèpvng àng svng Svrabín koqkámpè Celestine taqkèní svrado vya dang yàngà.
St. Patrick àngò nvmlat dvbùshvng bvnlì wàyàngì we shvrà nø àng vshuq wáshì we rvtø taq vlè roqshú wáshì yàngì we rvgaq gùr gùr taq íe wae. Mèpvng kaqnø Ireland móng górnì górtong shvngbe vriqò nø dvbùshvng mòngkà dvshvng yàngà. Yadang svng yàng bøà we shvngømré kaq vtù mvdòrì taqkèní St. Patrick svng shvtlvm vjøn lúngà.
Tiqni rvtø taq St. Patrick svng mangjøngí shvtlvm vjøn vtnà wae. We kvt St. Patrick nø tvrà shvnvngø vl rip dvrwe gømrà lìng kángshú tiqgø nvng rúngrà tvleshì nø rung we rat shìlvm kèní lutshì lún yàngà wae. Weyángø rúngrà tvleshì nø rung we gømrà lìng kángshú pènø we shvrà taq ni mangjøngí raké bøà nø lvpat zíshì yàngì. St. Patrick nø Ireland móngdàn vdòng taq 30 nøng døp gvray dvbùshvng bvnlì dvzaqshì yàngì we taq móngdàn køp svng Catholic shvngømré vsher ráì we íe.
AD 461 nøng taq Ireland móngdàn ò vháng vtang shìgùng íwe Aiqgvli shìgùng mvdàmø àngò lvpat làngdøm boq vjú røt shvmvn we svng wà yàngà. We shìgùng mvdàmø ni àngnø 40 ni 40 yaq vm-aq vnatshì nø vjúrøt shì bøì we mèpvng Ireland móngdàn nø mèpvng kaq shànshér vsvngrì gvzà bung longe wanø kà dvtut ráà we íe.
St. Patrick àng lvpat bébøì mèpvng angò ngàmshì we shagóng vnvng svng àngí nvmlat vrang yàngà we Pó myuqò noqngøm tøngnø taq rvda yàngà.