St. Pius

Shvnshvŕ we scrementu svng gvzà kám vlømshì we Svrabín koqkámpè St. Pius X nø AD 1835 nøng taq Venis myoq shvnvng vl we Risel myoq taq rvmá tvmø wavm we døngku tiqrap taq kèní gvlyàngà. Àng Svrabín vya dangshì bøì mèpvng nø dvbùshvng bvnlì taq gvzà dvgùng vl yàngì we tiqpè gø íe. 1884 nøng taq mandúwá svrado vya svng kámshì bøì mèpvng 8 nøng høq shaq Venis myuqò shvlshú vgo tiqpè íyàngì. AD 1903 taq àngsvng Svrabín koqkám danga:tnà rvtø taq vsvng kaya nø dàráì. Pàwálvm wani àngtaq vlømá:m vrvm we paqzí shìni mvkømzøp wanø vsvngrìí shøna:t nà. Àng kadvgvp gø shønwe nø yesu vdòng taq lvpat àngshár wáshì lvm wawe kà taq dvzaq dvkángshì we tiqpè gø íe. Nvmlat kámshì ràwe Sacramento svng 14 nøng wawe taq kèní 7 nøng taq kámshì ràwe svng vlíng vpo dvzvŕ yàngà we ínø àngsvng Pope of the Eucharist wanø lvpat mvshøl vl ráì we íe. St. Pius X nø shvngømré shølshúrì svng mòngkà dvshvngò we dang taq shvng shvng wa vsvng shvngbeí síngshá vrá lvm dø dvshvng lvm dvkám yàngà we íe. Europe móngrì nvng Australia móngrì taq mòngàn mvjàn bøn we rvtø taq móngøp we koqkámrì taq kèní àngsvng shvmán dvgøngã-lvm røtním shìráì rvtø taq àngshøn yàngìwe nø ngàtaq kèní mvjàn svng nvngòn ziwe mø:í møngzøl lvm dang wa nvngòn zìwe íe wanø shønyàngì. AD 1904 nøng nvmlat mòngàn mvjàn zømá:mì rvtø taq àng lvpat béyàngì we ínø àngí lvngdøm vru yàngà kàru taq ngànø dvshà mvhoq we vdòng ègvl yàngà nø dvshá mvré vlrángà wedø íratnø dvshà we vdòng taq ni lvpat bélvm shóngshønge wanø shøn yàngìwe íe.