St. Thomas of Aquino

St. Thomas of Aquino

St. Thomas of Aquino nø gvray paqzí vdè tiqgø íyàngì 1225 nøng Aquinas myuqø mvgàm ré døngku tiqrap taqkèní gvl yàngà. Mondegasino taq vlwe Benethet shvrúng shú zùng taq paqzí cvnshì bøì mèpvng Nepel myuq University taq zìdang vhángwe mònggvn paqzí rì cvnshì yàngì. We móng taq vlwe dvbùshvng bvnlì wa vsvngrì kaq shóngwám shìwe taqkèní àng vsvk 19 nøng taq St. Dominic shvrúng shú mvdò svng gòngvmì.

Vdá mvgàmwe St. Benedict shvrúng shú mvdò taq vl dvzvŕ mvyø we àngpèní àngmèí we dang svng tábøà kvt àngsvng mvdøng mvdaq vtàngò nø àngò pvlàcè dang shvrúng shú bvnlì svng nøt màyuq lvm dvpat àng svng zvmì shvzøngā lvm dvgøā lúngà. We kvt Thomas nø vtiqshì weí 2 nøng høqshaq tung rúng bøì mèpvng shvrúng shú zùng svng vrá tiqkvt vtáng yàngì.

1245 nøng taq St. Thomas nø paqzí dvtut cvnshì lvm dvpat Paris myuq svng búng yàngì. St. Thomas àngò nvmshìcè vlwe kà gvzà mvshøn we laqyà rat àngsvng svng dálpè wanø gø bøng zíyàngà we íe. Zùng dáng bøà mèpvng St. Thomas of Aquino nø mònggvn shvrà vrvm svng dinø dvbùshvng mòngkà dvshvng ámà.

Àngò cipshìwe nøt mvsøn, paqzí vlwe nvng gvray kaq kámwe nøt taqkèní àng bøngnø mònggvn móngdànrì vrvm taq bøngshvng yàngì. St. Thomas àng shønyàngì we taq ngàò paqzírì nø paqzí zùngrì taqkèní cvnshøng we mvtaq Yesu wurgáng tvrà taqkèní téwa cvnshì lú:ngòe wae. 1266 nøng kèní Summa Theologiae kàru svng àngí vru pvngyàngà.

Tiqni rvtø taq núngpà mvdàm vlwe Yesu wurgáng taqkèní àngsvng Ka táng shì ráì we nø Thomas nàí ngàò lvpat mvshøl tvrà svng gvzà shvladø nàru bøà werat nà kapà lún mèyøe má? Warøtnò kvt àngí kàngpè nà taqkèní dvgá pàgø mvshôngshøng wa vtang yàngà. St. Thomas àngnø ni vrvm rvtø mvlúngka taq vjúrøt shìwe taq wa rvtø zíshì we ínø tiq kvt kvt àng góng àng vnáshì we høqshaq vl yàngì we íe.

1271 nøng St. Nicolas bóy àngni noqngøm tìyø tiqlòng taq muqlàng kèní àngsvng shøngran tiqlòng dvtan yàngà. We dvtan shøngran svng vtoshì bøì mèpvng àngí vruò we kàru bvnlì svng nvrònø dvbùshvng mòngkà dvshvng we bvnlìrì taqwa rvtø zíshì yàngì. 1274 nøng Louise myuq zùpùng svng diwe tvrà taq záyàng gvbà vhømò weí làngdøm Sacramento svng kámshì bøì nø gvray kaq oqà wa dángí 2 ni vle vmì mèpvng àng vsvk 49 nøng taqni lvpat béyàngì.

St. Thomas of Aquino svng 1323 nøng taq shvnshvŕ vsvng tiqgø wanø dang yàngà mèpvng 1880 nøng taq vrá àngø paqzí zùngrì kaq roqgvr we shvnshvŕ vsvng tiqgø ku shvgùn shvring nø mvsvt yàngà.