St. Vincent de Paul

Dvsháza shóngnøt tvràrì taq dvzøm dvzaqshì vsvngrì kaq roqgvr pè St. Vincent de Paul nø AD 1581 nøng France móngdàn Povy myoq taq vlwe dvshà vsvng tiqrvp taqkèní gvl yàngà. Angnø cìsvra paqzí cvnshì bøì mèpvng vsak 20 nøng taq shvrúng shú jau vya svng kámshì yàngì. Nvmlat taqnø Pari myoq taq vdá mvgàmrérì dvhø Gvray bvnlì wayàngì.

We mèpvng AD 1617 nøng taq záyàngí vtøp kéòwe rvmá tvmø wavm we dvshà vsvng tiqgøò mvrà vchyángshì ráì kàsvng tá bøà kat we móngdàn taq vlwe dvshá mvhoq vsvngrìò pvlàcè dang nvngòn yúmwe dang svng shálún bøà.

We mèpvngnø angò gønshaq svng dvshà mvhoq vsvngrì dvpat apnúngshì lvm nøtrat shì bøì. Angnø Bari myoq kèní bú:ngámì nø rìngzìcè tiq mvring taq shvrúng shú wáshì nø rúng bøì.

AD 1626 nøng taq St. Vincent í dvbùshvng mòngkà zùng tiqlòng svng we yá:ngø poqpvng bø:à nø apnúng dvzaq shìyàngì. St. Vincent nø dvshá mvré vsvngrì dvpat shá dvzitwe pvlàcè chutcháng we mvdò rìgø poqpvng yàngà we íe.

Angí shvngøt dvtú we taq dvgá bvnlìrì mvdàm dvshá mvré vsvngrì kaq dvbangshì ràwe, vjú røta dvbang shìràwe nvng lvma dvshà vsvng tiqgø cìzí dvbangshì ràwe ínìnø shaq shaq wa dvbangà ràwe svng dvkám yàngà.

St. Vincent shøn yàngìwe taq Gvrayò dvsháza shóngnøt mvdàm angí mvrà vrí dàm zira lòng svng téwa svre shìràe wa shøn yàngì. Angnø AD 1660 nøng Bari myoq taq lvpat béyàngì.