Tìløp yohán svng vgo tutnø shat yàngà àngni

Tìløp yohán svng vgo tutnø shat yàngà àngni
Yesu kristuq ò àngnvm vdu we tìløp yohán nø yudeā móng Zakaria nvng Elizabeth taqkèní shøq yàngà. Àng vsvk 30 nøng dvgvp chángkàngpè Mesíyá tuqrawe svng dvgø shìlvm dang Jordan rvmè shvnvng rvgaq mvgong móngø dvshvng pvngyàngà. Wedø àngò mòngkà dvshvngwe bvnlì nø yesu kristuq tìløp kámshì bøì we rvtø høqshaq íyàngì.
We mèpvng herot koqkámpè nø ànglàmè Herodias nvng dvchvpme wanø shvngkà dvhú ráà weí tvpké yàngà. We yáng kèní Herodias nø tìløp yohán mvdàmø shvmná mvgør we í shvtlvm dvdam yàngà. Herot koqkámpè ò shøqwe àngni bóy tini taqnø Herodias í vko vkáng tiqlòng lúng yàngà. Welòngnø we bóy àngni taq Herodias ò àngcèmè Salome ò vnvpwe lám dvtan vngvt hang rat Herot koqkámpè í àngsvng kàpà shònge, shònglòng svng zílvm íe wanø dvkámòe. Wekvt Herodias í røtshì wenø tìløp yohán ò vgo svng zí lvm røtshìe. Wekvt koqkámpè nø gvzà nøt mvbyo vmìwe ínìgø mvnvmrìò mvrtaq àng zíshì bøìwe kàsvdiq cvn dvgøm ràwerat nøt vráā yàngà. Wemèpvng tìløp yohán ò vgo tut svng bàn taq lángāvtnànø koqkámcèmè svng zí yàngà. Welòng svng àngí vrá àngmè kaq tvle òe. Weyáng kèní yohán coqcánrì nø ngáshìwe tìløp yohán ò shagóng vnvng svng lùò nø køm yángà.