Vnà í zìn nø tá dángí dvtøp ràe wawe paqzí lushì shvla we nøtsun paqzí vdè Socrates ò shvngøt dvtú kà 3 kà

Vnà í zìn nø tá dángí dvtøp ràe wawe paqzí lushì shvla we nøtsun paqzí vdè Socrates ò shvngøt dvtú kà 3 kà

  Tiqni taq nøtsun paqzí vdè tiqgø íyàngì we Socrates ò dvzømshú tiqpèí shvngkà tiqlòng àng svrapè kaq dvtúvtnà wae. Wedø Socrates àngkaq dvzømshú pèí dvtávtnà we svng vtà:ngò nø shvngøt dvtú ò we paqzí kà taq Svra pèá rvmnvng tiqgø í rívtnà we shvngkà tiqkà ngàí vkvtni lá:ngvtnà vlòe. We kvt svra pèí íni nàí rívtnà we shvngkà welòng svng vtì zìn 3 lòng taqkèní shini zìnshòlè vlòe.

  Kadø íwe vtì zìn ímá wa dvzøm shú pèí røtnò kvt Nvmlat tiqlòng nø døngmvn dvrá íe vlòe. Nàí shønlvm shvngkà welòngnø kømgøm jònø ding longe má walòng svng shi zìn shò. Nàí èrívtnà we welòng shvngkà nø jøng jøng ni dìnge wanø nà kámshì èlú:nòe má? Wa røtnòe. Ngàí gø vsvng yáng kèní tá: ngvtnà we rat jøng jøngni jòe wanø nø kámshì mvlúnò svra pèá wa vtàngòe. O! Ínìnø nvmbat 2 vtìn zìn lòngí vrá zin shò. Welòng vtì zìn nø kapà íe svra wa røtnò kvt. Yalòngnø vjú ziwe walòng íe vlòe.

  Vkvt nàò shvngkà yalòng nø vjú zílún we shvngkà íemá wa røt nò kvt. Vjú mvziwe shvngkà ni ína íe svra pèá wae. Ínìnø nàò shvngkà yalòng nø dìng we shvngkà mø:í we mvtaq vjú mvzi we gø bøn sháòe. Ló! Íni làngdø vtì zing longí vrá zìnshò vlòe. Welò nø kapà íe svra pèá wa røtnòe. Yalòngnø zømdàngwe walòng íe.

      Nàí ngà svng shønlvm shvngkà nø zømdàng we gø íemá? We røtnò kvt Omm! Kadø ílong we svng ngàí gø mvsíng mvshá:ngò svra pèá wae. Íni nàò shvngkà yalòng nø dìng wegø mvvl,màshvla we gø bøngsháò we døni zømdàng wegø mø:í. Pàwálvm ngà yáng svng le shønvt nòni vlòe. Svmi mvyø wawe nø svmi møtnò vsvng vlnø wa mvyø dø longwe mø:í má? Svmi møtnò we vsvng mèwá shì nøngni, svmi maqlvm vsvngrì màng leq ílóng nøng. Pà vjú gø mvvl lvjøm màdá shvngkà rì svng mètángā nøngni. Welòng svng dvshvngnø dvtit tvle we vsvngrì gø mèwá shì nøngni wanø shvngøt dvtúòe.