Vsvng lvpat svng vpø shvring shìshá lúnlvm wawe tvnù mangá taqkèní tiqyaq chvpgá gvray kaq vjúrøt shìwe

Vsvng lvpat svng vpø shvring shìshá lúnlvm wawe tvnù mangá taqkèní tiqyaq chvpgá gvray kaq vjúrøt shìwe

********************************* ****************************   ***********************************  ***********************

American móngdàn taq nøng vrvm wáshìwe vsvngrìò lvpat vpø shvring shì shálún lvm dvpat wanø móngkøp vsvngrì tiqyaq chvpgá vjú røt shìwe tìyø svng yanøng taqnø Covid 19 nvng singwe dvrá rìrat January 28-29 ni taq online mvdàm kèníwa wávdu longe. We tìyø svng American móngdàn Catholic svrado àngké mvdò (U.S. Conference of Catholic Bishops - USCCB) tvrà shølnø wàò wegø íe.

American móngdàn taq 1973 nøng taqkèní cvmrégóng íwe svmarérì cvmré dvjá lúnwe vkáng svng dvráshvng mvsvt yàngà. Wedø dvrá gvlshì bøì mèpvng American móngdàn taq cvmré dvjáò vsvng 60 million ján gø vlráì. Werat we dvrá svng vrá shvmáng lvm vgámnø nvngòn dvtanwe vjú røt lìpùng nøng vrvm wáshì we íe.

We vjúrøt lìpùng svng Washington DC taq vlwe mvrà mv-vl we yesu àngmè noqngøm tøngnø taq wáshì wegø íe. Wemèpvng vsvng loksukrì cvmré dvjáwe dang vgám we nvngòn dvtanwe lìpùngrì wáshì we íe. Online mvdàm kèní dvkanglvm dang Covid 19 yóga zønlì ratnø noqngøm chømrì nvrshì we írat 1974 nøng kèní wáshì ráì we ya lìpùng svng online mvdàm kèní nvmlat boq wá vdu lvm íráì.

We lìpùng svng we móngdànò svradorì taq kèní shølnø chvpgá vjú røtwe lìpùng svng walvm dvgø shìwe íe. We lìpùng svng USCCB website kèní dvkang lvm ínø January 28 lvbán 4 ni dørøm 8:00 kèní pvngshìlvm ílonge. Svrado àngkéróng vgopè svrado Naumann shønwe taq yamóng taq rvgaq mvdàm shì mvtuq ràwe cvmrérì shvngbe dvpat nvng vsvngrìò dvgùngrì dvpat vjúrøtā lvm wanø dvkám bøà.

Ya lìpùng bønráì we mvshøl Vsvng 20000 gø dángte nvngòn dvtanwe, vjúrøtwe lìpùng svng 1974 nøng taq nvmlat boq wá shì yàngì. 2011 nøng tuqráì kvt vsvng gorø 300000 gø dángte høq luq mvnshì ráì we íe. credit to CBCM