Mònggvn Radio àngni

Mònggvn Radio àngni

Radio wawe nø mònggvn svngpvn dvcìrì màbóng we dvhø taq svngpvn dvgùng svng shvring shvtà lvm mvn dvrè tiqlòng ni íe. Mònggvn taq Radio walòng nø vsvng mvlúng kataq kèní lángshì we dvrè tiqlòng ni íráì. Pàwálvm wani mònggvn taq Radio nø rvtø àngdungcè vdòng shvngkà rì svng dvkang lúnwe, vsvngrì nvng vtoq vtip lúnwe taq lángshì we tiqlòng írat íe.

Radio nø mònggvn svngpvn dvcìrì ò paqzí dangrì mvtaq dang àngpvn pvn rì, shvngkà rì svng mònggvn shvrà vrvm, shìgùng móng vdám móng rì kaqsvng tuqlún dvshangā lún we dang taq gvzàni zømdàng we íe. Yalòng nø chyak chyak shvngkàrì, tòniò dvjángrì bung rakvt vtoq vtip lvm taq gvzà zømdàng we íe. Yalòng nø svngpvn dvcìrì shvngbe vrvm vrá lvm, vzøm lvm tvrà rì taqgø ràwe dang rìsvng tubùm dvbangā we íe.

Yani mvsat shì we ò manggá UNISCO mvdò taqkèní 2011 nøng taq lìpùng gvbà svng wàlvm shúng shì yàngì. We taq rvmánzøng vgo pè Academia Española de la Radio taq kèní gø we lòng svng vto yàngà. Wedø UNISCO taqkèní shún lúngà we ó 1946 February 13 taqnø mònggvn rvpdoq UN lìpùng taq we ni svng mvsat shì bøì we íe.

We ni kèní February 13 ni nø mònggvn radio àngni wanø mònggvn svng dvkám bøà we íe. Weni dvpat mvdøng gvlshì we àng manggá nø vsvng màngpòng rìdvhø taq Radio nø vjú vl nø zømdàng we dang téwa síngshá lúnlvm dvpat , Radio nvmbøng tvrà kèní dvkang we shvngkàrì, dvkám kà rì tapshì nø vtoq vtip lúnlvm nvng mònggvn vsvngrì vzøm we dang taq dvbangā lúnlvm dang dvhángā lvm dvpat íe.

Radio nvmbøng tvrà shvngkà dvshvng lúnlvm mvnbøà weó vle á:mì we àngsé mvzuq nøng rìtaq kèní gvzà ni zømdang dø vjú zíshì ráì we íe. Yalòng nø nøng maq svngpvn dvcìrì lvpat zìdang vháng lúnlvm dvzaq shàì we dang taq gø shvngkà tvrà kèní gvzà vjú ziwe tiq dang ni íe. We dø írat mònggvn Radio àngni svng vsvng shvngbe í síngshá ìwe taq vpø shvring laqlúnì.

"Ya mònggvn Radio àngni taq màbóng we vsvngrì dvhø mòngzøl lvm dang téwa dvhàngì nø vsvng lvpat zìdang vháng we mònggvn svng vrang shìlvm Radio shvngkà tìyø rìsvng vpø shvring laqsháì" UN bvnlì àngkàng pè- General António Guterres.