"Cardinal charlers Boí angbøng kèní poqshì we, bøng mv-sháshì we Vsvng tiqgøò twitter account svng nar dvzvrò we"

"Cardinal charles Boí angbøng kèní poqshì we, bøng mv-sháshì we Vsvng tiqgøò twitter account svng nar dvzvrò we" Shvngkà

Twitter company kèní Cardinal charles Bo bøngí poqò we twitter svng nar bøā we íe. Pàwálvm wanì nar lvm rvt røtnimshì rvt íe wànø Twitter company kèní dvtvnò we vlē.
Vkvtdø dvtvnò we shvngkà mvtú nvng singdø àngbøng nvng Twitter account pìtālvm rvt røt nimshì gø nø Cardinal íwe dang, pàwálvm wanì àng taqkèní account poq we mà-vl pàdø, Láng we gø mà-vl rvt Cardinal àngbøng svng dvgá tiqgøí dvtvnò we íē.

We pàdø Vaticanò Shvngkà mvtúrì gundvtøp dvp íwe Fines dvp kèní Cardinalò Shvngkà bvnlì angkangpè ígø Cardinal nø feabook nvng Twitter rì mvlàng we dang, Wervt Cardinal àngbøng taqkèní poqò nø Twitter mvr taq hapshì we angmvturi shvngbè nø Cardinal í hapmō we Shvngkàrì mø-í we svng bønòē.

Twitter taq sandaq bya dvtvnò rì, yérìí sanatni wàpmō dvgvp Catholic dvzømshú Mama tiqmeí sanatni wàpnø dvkvng we mv-wā lvm rvt bvnciq tūshì nø røtnìm dvbvng we sømla hàng svng dvtvnòe.we lòng sømla hàng nø Cardinalò Twitter mvr taq dvtvnshi we dang svng mònggang media rìí gø dvtvnò nø vrù bøā. Welòng sømla hàng nø yàngò we gø vrvmō nønt mvsøn vdòngø gvzà nønt yor dvzvr we hàng íē.

Cardinal àng bøng taqkèní poqò we twitter account svng nartbøā kvt tiqmaq media rìí nø vkvtdø account narā we nø pyenrìò gvsvt íe. Angmaq mvdò taq døngjà vhàmè wanø shønòe. Íni gø Fines Shvngkàdvp kèní shøn we taq pyenrìò gvsvt rvt pìtò we mø-i we dang, Cardinal angò Twitter account gø mø-í we dang, Wervt Cardinal angí ni welòng account svng pìtā lvm rvt røtnim shìbøí we svng pønà bøā we íe.

Cardinal charles Bo taqkèní narnī angò Mongkà dvshvngo yv'ng kèní dvgá dø dvrashang dvtvn we mà-vl wanø Fines Shvngkàdvp kèní zvndvttut dvtvnbøā we íē.