St. Pius X

St. Pius X
Yesu kristuq ò shagóng Sacramento taq kámnør shvre tiqgø íwe St. Pius nø AD 1835 nøng Venis myu shvnvng Resel myuq taq rvmá tvmø wavm we tiqrvp taqkèní gvlyàngà. Àngnø shvrúng shú vya svng kámshì bøì mèpvng dvbùshvng bvnlì taq mànvr nvr dvzaq dvkángshì ráì weí gvzà bøngshvng we shvrúng shú tiqgø gø íyàngì. 1884 nøng taq àngnø Manndowah svrado vya svng kámshì bøì mèpvng 8 nøng wanøng taqnø Venice myuqò svrado vgo vya svng kámshì lún yàngà.
AD 1903 nøng taqnø shvngømré shvngbe svng shølshú vya íwe Svrabín koqkám vya svng kámshì lún yàngà. Nvmlat taq àngnø paqzí dang, svngpvn vtoq vtip we mvkrøm nvdøprì taq kùngà vnøn we ínìgø gvray bvnlì vdòng kámshì we nøt, pvlàcè dang nvngòn kùngà dvkángshì we tiqgø íwe rat dang vrvm taq jór nvngòn lúnòe wae. 
Àng taqkèní mvrà vroqshì we Scramento svng vsvk 14 nøng mèpvng kèní kámshì ràe wawe tóng svng vsvk 7 nøng taqkèní kámshì lúnwe dvrá svng vrang ráà werat àng nø Pope of the Eucharist wanø mvshøl taq bøng shvng yàngì. 
Svrabín koqkámpè Pius X nø gvray bvnlì, dvbùshvng mòngkà dvshvng we tvrà rì taq shvng shvng wa dvshvng ràwe nvng we tvra svng téwa shvla dø vrangā nø shvrúng shú rì kaq svng gø téwa tubùm dvbangā we tiqgø gø íyàngì.
Àng taqkèní pin mvjàn rìsvng mvshóng wámshìwe mvtaq wedang svng vgámnø shvzøm we bvnlìrì taq dvzaq dvkángshì shìwe gø íe.
Wewa mvtaq Australia, Hungary dvcìrìò gàmzø koqkámpè cìdvp kaq svng Svrabín koqkámpè taqkèní shvmán dvgøngā lvm røtshì we taqgø àngí vtànò we taq ngàí nø pin mvjàn dvpat vjú røt nòwe mø:í, cømsaq mòngzøl lvm tvrà dvpat mvng vjú røt nòwe íe wanø shøng yàngì.
Svrabín koqkámpè Pius X nø AD 1904 nøng nvmlat boq mònggvn mvjàn dáng bøà we rvtø taq lvpat béyàngì. Àng shì mvshì dvgvp vru yàngà we lvpkà, kàru taq ngànø dvshà mvhøtwe we dvhø èshøk rá ngà. Dvshà mvhøtwe tvrà taqni cúnshì vdu bøì nø we tvrà taq ni lvpat zíshì lvm svng ngà shóngshønge wanø vru yàngà.