Russian nvng Ukraine tvrà taqø Vatican kèní gòng nø parvnālvm rvt dvlú íwe dang

"Russian nvng Ukraine tvrà taqø Vatican kèní gòng nø parvnālvm rvt dvlú íwe dang"

Vaticanò bvnlì àng kangpè Cardinal Pietro parolin í Vatican taqkèní Russian í Ukraine kaq gòng lòng svng nar nø mongzøl lòng lúālvm
rvt lúndaq we dangkèní gòng nø parvnālvm rvt dvlú íwe dang, Svrabin Koqkvm Francis kèní Gvrayò bø':ng vdòng taq Vkvt bø'nbú:ng we mvjàn lòng nar lúnlvm rvt ra we dang svng shøn bøā dvkvm bøā mèpvng shøn bøā.

Cardinal nø vlēá:mi we àngni rì taq Russian móng lvmang wønjí Sergej Lavrov nvng kà dvmàn bø'ì we tvrà dang svng tiqkvt dvdvm weí russian nø Vaticanò dvkvmkà ciq lòng svng tálú:nò we íni gø we dvkvmkà lòng nø vduè wanø vtōshì nø shønlvm rvt vkvt høq íni gø àng shø'ngmvng yv'ng mvlúnshì.

Vaticanò røtkà lòng svng vtōshì we, màtoshì we nø mvdøng vchvk nø mø-í. Mvdøng vchvk lòng nø Vkvt bø'nbú:ng we mvjàn lòng svng nar dvtáng lvm rvt íe. Vhøm nø mv-ngushì we vl kvtwā shvlá vtv'ng àng mvtú lúnlvm ràe. dvgá tiqlap yv'ngkèní gø Sasvna me ínø vlún dvngte dvnúngà we dang, Kà shvbóng kèní Svrabin Koqkvmpè ínø mongzøl lvm dang rvt angbaq angbaq røtnímshì we, vjúrøt dvbangà we, mv-rà mà-vl we móngzøngcerì nvng tiqdø rìp we dang, Ukraine móngdànò Vatican Shvngkà kønmvng nvng rvtø vrvm vzø'm nø v-toq v-tip we dang, wē pàdø røtkà mvtúrì, San daq tukpō we gø angbaq angbaq wá rà we dang, vlē a:mì we Narni taq gø svrabín Koqkvmpè nø ungelu vjúrøt kà svng røt dv'ng bøā mèpvng vjúrøt mvdò kaq dènila bø'n we mvjàn narlvm rvt vjúrøt dvbvng lvm rvt røtnímshì we dang dvkvm bøā.

Russian móngdàn taq gø vkvt bø'n we mvjàn lòng svng vgám nø sàndaqbyà we bvnlìrì mvmè vl we dang, yalòng nø vlø'mshì lvm lòngò kùmla íwe dang, Cardinal kèní svrabín Koqkvmpè ò vzaqshi nø, Mongzøl lvm dvpvt mèpvng kaq màtáng vzàqshì we vzàm rvt gvzà shvgùn lvm ra íwe dang, Yalòng mvjàn rvt nøngmaq shvngbe gø zá vhø':mì we dang nvng yalòng mvjàn nø mvtú lvjøm mà-vl we mvjàn íe, wànø shøn bøā.