Costa rica svradorì í Mother Teresa Sister mvdòrì sv̀ng vtoò we Nicaragua móngdàn kèní lú:ngò we vhǿm bǿà we Mother Teresa Sister mvdò (Missionaries of Charity) kèní Sister rì sv̀ng Costa Rica Svradorì í pàmvràcè vto bǿà wegø íe.

Costa rica svradorì í Mother Teresa Sister mvdòrì sv̀ng vtoò we Nicaragua móngdàn kèní lú:ngò we vhǿm bǿà we Mother Teresa Sister mvdò (Missionaries of Charity) kèní Sister rì sv̀ng Costa Rica Svradorì í pàmvràcè vto bǿà wegø íe.

 Costa Rica móngdàn Tilarán-Liberia kèní svrado gvbà Eugenio Salazar Mora nø Nicaragua Gv̀mzø̀pè Daniel Ortega ò vsúyaq mvdòí lù:ng bǿà we Mother Teresa mvdòò shølshú sv̀ng July 6 ni pàmvràcè vto bǿà wegø íe. Yanila rvtø̀ taq Kalagata kèní Mother Teresa Sister mvdò rìkaq sv̀ng Costa Rica móngdàn Canas myuq kèní vto bǿà wegø íe. “Yadø vtoshì wenø Kàngpè Yesu sv̀ng vtoshìwe ni íe” wanø gø vtàn bǿà we íe. We móngdàn taq nø vsv̀ng dvcì pv̀nrì mvmepv̀n kø̀mwe ínø̀ vsv̀ng tiqmaq nø vsvk té bǿì we ínø̀ àngmaqò mèpvng lvpat shømløm lv́m tvrà sv̀ng nøtbùm nø svrenøt í mvchum kéò ínø̀ Costa Rica móngdàn vdòng sv̀ng tuqráì we rvtø̀ høqshaq nøtbùm lv́m vhǿ:mò we dang vtàng bǿà we íe.

 Àngmaq nø Nicaragua móngdàn sv̀ng shóngshì we ínø̀ we móngdàn taq wani vl mvyǿwe ínø̀ Nicaragua móng vsv̀ngrì nv̀ng tiqdø vl mvyǿ we dang vtàn bǿà we íe. Svrado rìí dvkámwe dvtú kà taq “ àngmaq yv́ng kèní kadø íwe vléshì tvrà rì gø mvyv́ngshì wedang, àngmaqnø svmarérì wani ínø̀ Kàngpè Yesu ò dvzømshú wáshì lv́m nv̀ng dvshà vsv̀ngrì kaq tubùm dvbangā lv́m mvdòrì ni íwe dang vtàn bǿà wegø íe. Ínìgø yadangrì shvngbenø Kàngpè Yesu ò lvpat ni ínø̀ kámnøt shvrerì dì bǿì we pvlàcè lvpat tvrà ni íwe dang vtàn bǿà we íe. Kàngpè Yesu ò shvngø̀mré wawe nø shvnip shvnvr vhǿmò we shvngø̀mré tiqlòngni íe wanø dvkám we íe.

 St. Thresa of Calcutta svng cvnshì nø àngmaqnø dvshà vsv̀ngrì nv̀ng mvkøm mvzøpwe nv̀ng tubùm dvbangā ràwe vsv̀ngrì kaq dvzømshú wáshìlv́m dvpat dvzaqshì we íe. Nicaragua móngdàn dvpat vjurøtā lv́m røtním shìtaq sor:í Yesu Kristu sv̀ng lú:nò we íwe dang nv̀ng nøt kùngà dvzaqshì nø zàn dvtut taqgø gvray bv̀nlì taq dvzaqshì ràwe dang vta:nò nø dvkám bǿà wegø íe. Wemóng taq vmíng āna zø̀mwe gv̀mzø̀pè Ortega móngøp rúngtàng taq rungwe 15 nǿng íráì wegø íe.

 June shvlá 6 ni taqgø móngdàn vdòng dvsháza bv̀nlì wawe 18 gø svnggø móngdàn kèní lùng bǿà wegø íe. EFE shv̀ngkà taqkèní vtànò we taq Mother Teresa nv̀ng dvgá NGO mvdò rì 100 rvzé sv̀ng móngdàn kèní lùnglv́m June 29 ni taq dvkám bǿà wedang vtàn bǿà we íe. Yadang nv̀ng singnø̀ Nicaragua móngdàn ò dvrá uqbvdi mvdò kaqsv̀ng gø Ortega í shølò nø Sandinista cìl dvpkèní zǿmshaq íwe íe. We móngkèní lùng bǿà we rì taq India vsv̀ng 7 gǿ, Mexican vsv̀ng 2 gǿ, Philipine vsv̀ng 2 gǿ, Guadimala móng vsv̀ng 2 gǿ, Nicaragua vsv̀ng 2 gǿ, Spain móng vsv̀ng 1 gǿ, Equedo vsv̀ng 1 gǿ nv̀ng Veitnam vsv̀ng 1 gǿ maq íe.

Svrado Salazar í we tvrà nv̀ng singnø nòngwønzi we dvkám kà taq “ làngdø̀m àngni taqnø shóngnøt taqkèní wa jórlún lv́m ílonge. Làngdø̀m kàngngé lv́m gø gvray àngni íe. Kùngà dvzaqshì nø̀ vzàng lvpsv̀ng dèzaqshì nøng Nicaragua móng vsv̀ngrìé “ wanø̀ dvkám we íe. Yadang nv̀ng singnø̀ CNA shv̀ngkà taq Spain kàí vtàn bǿà we sv̀ng ACI Prensa mvdò kèní English kà ku vrá kà tvle bǿà we íe.