Bvngpuwvn ( Mongkà kàru dvshvng chøm) nø Bangkok Catholic Gaiíchuk sasvnaò shvngømré nvng sing we dintán zí we shvrame ínø February 24 ni kèní 26 ni høq Asia móngdàn nvng sing we Dvmaq Nilakvn svng chøm àng kvng ku vtolvm í bø'ì.

Shvngkà dvkang we mvtú 1 February 23,2023

Bvngpuwvn ( Mongkà kàru dvshvng chøm) nø Bangkok Catholic Gaiíchuk sasvnaò shvngømré nvng sing we dintán zí we shvrame ínø February 24 ni kèní 26 ni høq Asia móngdàn nvng sing we Dvmaq Nilakvn svng chøm àng kvng ku vtolvm í bø'ì.

Vhøm mv-ngu shì we lìpong kaq svng køm ngø'm ráì we køngmvng rì nø móngdàn ku Svrado rì mvdò àngké (17) lòng yv'ngkèní Dvmaq Nilakvn kønmvng rì, Catholic shvngømré me nvng sing we Svrado rì mvdò kèní Svrado (2) pè, Asia móngdàn Svrado rì Nilakvn mvdò àngké (FABC) svng vpoq shaq íwe móngdàn muqhø'm shvngbe (29) móngdànò kønmvng rì íwe Svrado mvdò rì køm ngø'm ráì.
Wè Dvmaq Nilakvn tvrà taq Cardinal gvba (6) pè, Gaichuk Svrado (5) pè, Gaichuk Svrado (18) pè, shvrúngshú Jau (28) pè, dvzømshú Mama (4) gø' nvng shvngømré (19) gø' køm ngø'm bø'ì.

Té vtv'ng nvng Vsvng gorø luq vtv'ng íwe Asia móngdàn nø màbóng we Tong laqyarì, svng pvn Kà rì, dvci dvgøng rì nvng shvngømré vtóng rì í mongzøl we íe.Rvzvngce rì nø Asia móngdànò shvra rvgaq shvngbe taq gvzà mvluq cvm vtv'ng íni gø tiqgø' chím kèní Tong laqyarìò vshò we dang taq nø shvngømré dvpvt gvzà nøntshøm dvbú rà ìe.Kvmnønt tvrà rì, vpø vtv'ng rìò mvsvt kùmlà rì nø tiq shvra nvng tiq shvra vlíng we íni gø vsvng pvn v-toq v-tìp we dang nø Asia Vsvng dvcirì kaq svng muqhøm wáshì dvzvrè.

Banchvk rì vl we íni gø Dvmaq Nilakvn tvrà nø Catholic Sasvna dvpvt jèjú ìshøt nvng dvban weò rvtø wā vtoshì shvlaè. jisher pàdø Sasvna mèo àng hàng nø wè rì shvngbe vbá we Nøntní lvjang we dvgø'qshì tiqlòng ku hàng sóyò we íe. Mong mvzøl we nvng dvshá mvhøt lvm rì vbá nø Gvray gvsangò Pvlàcè vl we shvra vrvm taqø Gvray gvsang nø shiyat chøm ce wáshì lúnò we svng gø dvtánò we íe. Mvdøng vchvk we nø Gvray gvsangò shiyat chøm ce taqø Vsvng gø ' vrvm dvpvt shvra vlē. Kagø kaq svng gø mvgvm we íe. Vlē á:mì we rvtø taq ngvm we lvn vhø'm shì ni gø vkvt rvtø nø Ríng vtv'ng shvra ínø wè Gvrayò shiyat chøm me nø wè rì shvngbe dvpvt shvra vl we svng shálún shì bø'ì.

Shiyat chøm meò àng hàng nø svngza shvléshì yv'ngkèní nøngmaq dvhø yv'ng Yesu Gvray ínø àngò chøm svng wà bø'à we dang svng dvdvm dvzvrè.Wervt Gvrayò shiyat chøm me svng gø Gvray nvng tasvng tale vzø'm weí vhøm lvm shvra í lúngì.Dvmaq Nilakvn tvrà nø mvdò ce rì bongzup wáshì we tiqdø vzø'm weò vchvk dang svng téwa shá lúnlvm rvt Sasvna meò Toni dø vháng vlún lvm rvt dvtánòe.

Kønmvng rì tiqnønt tiqmvyung wáshì nø tiqdø tvrà dí lúnlvm, vjúrøt shì weí rvwèng rvzvng shì lúnlvm , vhøm mv-ngu shì weí dvnung lúnlvm dvpvt dvbvng lvm rvt Mubōng tiqlòng sóy shì bø'ì. Tuqra we vshøm ni vdòng kønmvng rì nø àngmaq byō we, tiqnønt tiqmvyung wáshì nø dìlúngì tvràò mvkøm mvdup rì, tvrà àngshvrò go we mvkøm mvdup rì tasvng tale dvtit tvle we wà lvm í daqè.Asia móngdàn kaq svng banchvk rì í dvzvr we tasvng shvngòkè nø cúnshì we, cúnshì we dang rì, shvrúngshú lvpat àngshvr kaq svng go we dangrì, zilàngré dang rì, dvshá hoq rì, shvngømré banchvk rì nvng shvrúngshú rìò dang rì svng gø mvdøng vrashì nø dvnung lvm ídaqè.

Poqwe Missa Kàgvp lìpong íwe shànshér we Pvlàcè Gvray kaq svng Noqngøm we Missa Kàgvp svng Japan móngdàn, Toju Gaichuk Sasvna øp nvng Asia móngdàn Svrado mvdòò bvnlì àngkang Gaichuk Svrado Tarcisio Isao Kikuchi၊ SVD၊ í shøl nø Noqngøm bøā. Wè mèpvng dvdvm vjáng we nvng rvdoq rvwvn lvm Kà Vgo rì svng kønmvng rì taqkèní dvnung nø wà bø'à.
Dvmaq Nilakvn svng dì ráì we køngmvng rìò dak dvdvm nø yvngò we dang svng dvtit tvle lvm rvt lvngdøm dvtánò we kàru svng gø dvtit tvle lvm ídaqè.

Gwāqnø kømzup we Asia móngdàn rvzvngcerì ku tiqnønt tiqmvyung wáshì nø tiqdø dìì lòng nø nøngmaqò vløm ra íe.