Symphony tiqlòng taq vzø̀mwe nvng vsvng tiqgǿ vrv̀m taq shúnshìwe kàshaq rì

Symphony tiqlòng taq vzø̀mwe nvng vsvng tiqgǿ vrv̀m taq shúnshìwe kàshaq rì

February 26, 2023 Lìpùngmè (3 ni wani)

Vle bǿìwe lìpùngmè ò 2 ni døni Asia dan Catholic shvngø̀mré mè ò lìpùngmè làngdø̀m àngni nø shv̀shér pvlàcè Gvray kaq vjúrøtshì we nvng pv́ngshì bǿì wegø íe.

Dèni rvtø̀ tvyø taqnø Philippine móngdàn kèní Svrado àngké vgopè Calo- ogan, Svrado Bishop Pablo David, Mìwà móng kèní Svrado àngké mvdòrì Ms. Teresa Wu, Asia dan Catholic Svradorì àngké mvdò Commission bv̀nlì àngkàng (FABC Synod Task Force) kèní Ms. Eestela Padilla maqí shølnø tvnùng bǿà wegø íe.

We lìpùngmè taq mvngushì bǿì we gvsarì nø àngmaq ò nøt mvsø̀n rì taqkèní vtán mvyǿwe lìpùngmè 2 ni wani ò tvyørì svng vrá dvtøpnø̀ dvtit tvle we nvng dvtøp nø mvngushì we wálún bǿà.

Relator General of the XVI Ordinary General Assembly of the Synod of Bishops, Lucinbob Cardinal gvsa Jean-Claude Cardinal Hollerich SJ kèní gvsarì kaqsv̀ng gø 3 dang kèní shún lún bǿà wegø íe.

We tvyø lvmvng taq noqngø̀m tvyørì taq lángshìwe zàywà shaqrì shø̀ni Music rì svng gø vdu vbóng vtok dø dvtøp lúnlv́m tvràrì svng gø vrashì nø dvmv̀n bǿì wegø íe.

Lìpùngmè ò 2 ni wani taq Cardinal Hollerrich kèní kámnøt tvrà dang taq cipshìwe nøt mvsø̀n laqyàrì kèní wáshì lv́m rà vchak we dang wedø nøt laqyàrì taqkèní wa kámnøt tvrà yv̀nggùng ngàngdøng lv́m íwe dang shǿn vtàn bǿà wegø íe.

We tvyø taq Cardinal Hollerich í shvngø̀mré mè nø Gvray dvbùshvng mòngkà svng dvsher lv́m nvng Gvray àngò rvcángcè rì dvpvt vdè vjú svng mvyv̀ng nø dvsháza bv̀nìrì wàlv́m Gvrayí dvkám we dang vtàn bǿà wegø íe.

We mèpv̀ng Fr. Clarence Devadass taqkèní làngdø̀m vrushøprì kaq svng vrá tiqkvt vtànò we wàbǿà wegø íe.

Lvmvng tvyøò vyv́ng rvtø̀ taqnø Asia dan taq vlwe Catholic shvngø̀mré mè dvpvt shvngø̀mré mè ò øpkángwe àng dvtàng tàngrì dang dvtøp lv́m nvng kadø íwe tvràrì svng vrá mv́nlv́m wawe dangrì, røtkàrì kaqsvng vrá dvtøp we wáshì bǿì we íe.

Wemèpv̀ng shvngbe nø mòngkà mvngushì nø vjúrøt shìwe nvng Asia dang Catholic shvngø̀mré mèò bv̀nlì àngkàng Mario Cardinal Grech taqkèní lìpùngmè 3 ni taq mvsøngrì kaqsvng vrá vtàn bǿà wegø íe.

Shvngø̀mré lìpùngmè ò làngdøm àngni svng dvdáng we vjúrøt Missa kùng kaqsvng nø FABC shølshú vgopè Cardinal Charles Bo taqkèní shølnø mòngzø̀l dø wálún bǿà. Yalòng shvngø̀mré lìpùngmè nø Yesu Kristu ò lvpvt rvgaq mvgongmóng rì taqdø ni yvklv́m àngpv̀n pv̀n dvhø taq wá vduwe ínìgø shvngbe ò nøt vráwe kùngà shaq kèní àng jejú vdòng taq vdáng lún bǿì wegø íe.

Cardinal Charles Maung Bo taqkèní nònggwòn ziwe mòngkà taq shvngø̀mré mèò bv̀nlì dvlàrì shvngbe nø shvngngø̀mré vsv̀ngrì shvngbe nø tasvng táā kelv́m, síngrv́l lúnlv́m nvng dvbùshvng bv̀nlì svng téwa wá dvzaqshì lv́m dvpvt íwe dang dvtú bǿà.

Yadangrì shvngbe svng cvn dvgømshì we rvtø̀ taq nøngmaq shvngbe nø L.E.N.T wawe Kàru chàngrì taq kèní nònggwò zinø dvshvt bǿà we íe.

L= gur ràwe dangrì taqkèní kámnøt tvrà vdòng taq dvzaqshì lúnlv́m rà  vchvk we dang

E= wawe taq tasvng vto vtip lv́m, Gvray àngò cv́nshúrì døni kámnøt tvrà taq lvmboqrì ò vtóng vl yv̀ngì we dø cvn dvgøm dvzaq shì lúnlv́m

N= tiqchø̀m cèrì dø wáshì lúnlv́m wawe dangrì kaqsvng mòngkà kèní dvshvt nø nònggwò ziwe

T= vlíng vposhì lúnràwe dangrì kaq svng we lìpùngmè dvdáng lv́m vjúrøt Missa lìpùng taq mòngkà kèní dvshvtnø nònggwòn zíbǿà wegø íe.