St. Fidelis of Sigmaringen

St. Fidelis of Sigmaringen
Martyaw nø Germany móngdàn tìni lvp vlwe Simarigin myuq taq gvl yv̀nga. Àngpè nø we wama ò cìl dù tiqpè gø íyv̀ngì. Àngnø dvrá uqbvdi paqzí svng (6) nǿngdøp cvnshì yv̀ngì. Àngnø nøt mvsø̀n shèrwe vsv̀ng tiqgǿ íwe taq bø̀ng shvngwe vsvng tiqgǿ gø íe. Àngkaq svng dvshà vsvngrì dvpvt dvsháza shóngnøt zø̀ngpè wanø vlǿmá:mòe. AD 1611 nǿng taq àng lvpat 34 nǿng taqnø we dvrá vjì paqzí kèní nø vsvngrì ò nøt mvsø̀n kaqsvng vyuq dvzv́r e wanø Gvray tvrà taq dvzaqshì lv́m nøt ratshì ráì. 
We rvtø̀ kèní àngò bv̀nlìrì shvngbe svng gurò nø shvrúngshú bv̀nlì taq dvzaqshì taqsó:rí dvshà vsv̀ngrì kaq àngò zaqshøprì svng gø vwv́rā yv̀ngà. Àngnø shvrúngshú lvpat taq Fidelis wawe bø̀ng tǿshì nø Gabuchín shvrúngshú mvdò taq dvzaqshì yv̀ngì. 
Shvngø̀mré kèní poshì bøwe vsv̀ngrì kaq Gvray dvbùshvng mòngkà kèní vrá vwángshì dvzv́r we bv̀nlì rì taq gvzà dvzaq shìwe tiqgǿ gø íe. Àngtaqkèní mòngkà dvshvngwe bv̀nlì mvdàm kàru kèní dvshvt we dang taq téwa dvzaq shì wegø íe. 
AD 1621 nǿng taqnø àng kaqsvng Svrabín koqkámpè ò gvsa ku dang yv̀nga. Àngí Bendine shvrúngshú mvdò svng gø vrá tiqkvt dvcøp vrang ráà wegø íe. St. Fidelis àng kaq Switzerland móng svng Gvray dvbùshvng mòngkà dvshvng lv́m gø dvzv́r yv̀ngà we íe. 
St. Fidelis nø Gvray bv̀nlì taq vtang kèní dvzaqshì we tiqgǿ gø íe. Yesu wurgáng tvrà, Gvray mòngkà, vjúrøt kàciqrì nvng Gabuchín dvcìrìò dvrá uqbvdi kàru rì kèní Sasvna bv̀nlì taq dvzaqshì we tiqgǿ gø íe. Àngtaqkèní shvngø̀mré svng vtù we vsv̀ngrì kaq mòngkà kèní dvshvt we bv̀nlìrì taq dvzaq shìwe tiqgǿ gø íe. 
Wedø íwe bv̀nlì rì svng téwa vtù we Protestant rì taq kèní St. Fidelis àngkaq svng gvsat vjøn we vdòng taqøni lvpat zíshì yv̀ngì we íe. St. Fidelis nø Gabuchín mvdò kèní Sasvna bv̀nlì taq dvzaqshì ráì we nv̀mlat kámnøt shvre tiqgǿ gø íráì.