2023 nǿng mònggv̀n zìlàngré àngni poqpv̀ng we vjúrøt tvyø svng Lesbon Cardinal Manuel Clemente kèní shøl nø wáshì bǿì we

2023 nǿng mònggv̀n zìlàngré àngni poqpv̀ng we vjúrøt tvyø svng Lesbon Cardinal Manuel Clemente kèní shøl nø wáshì bǿì we
Mònggv̀n làngré àngni svng Portugal móngdàn Lesbon myuq taq August 1 ni taq poqpv̀ng bǿà we ínø̀ we lìpùngmè tvyø svng August 1-6 ni høqshaq wàlv́m íbǿì.
We lvmvng tvyø poqpv̀ngwe vjúrøt Missa kùng svng Cardinal Manuel Clemente kèní Parque Eduardo VII taq mònggv̀n zìlàngré rì kaqsvng vto bǿà wegø íe.
Svrabín koqkámpè Francis nø Purtogal móngdàn svng August 2 ni taq tuq lú:ngì wegø íe. Yalòng tvyø lvmvng nø mònggv̀n Covid dvjáng rat nvrshì ráì we ínø̀ yanǿng vdòng taq vrá wá pv́ngshì ráì we íe. We lvmvng tvyø svng poqpv̀ng we Missa vjúrøt kùng svng shøl we Cardinal Luis Antonio Tagle nvng dvgá móngdànrì kèní kø̀m ngǿm ráì we Cardinal rì, we lìpùng svng tuqráì we shvrúngshú rì shvngbe gø we kùng taq kø̀mngǿm ráì wegø íe. Wewa mvtaq we móngò móngdàn vgo pè Marcelo Rebelo de Sousa gø tuq ráì.
Mònggv̀n zìlàngré àngni vjúrøt kùng svng shøl we Parque Eduardo VII nø mònggv̀n dø̀ng kèní kø̀m ngǿm ráì we zìlàngré kaya nvng vdè dè ò móng svng dvtan we dòngkon hangrì taqkèní dàn vshøt á:mì wegø íe. Mònggv̀n zìlàngré àngni Yesu wurgáng hang svng gø, Salus Romani Populi Mari hang sø̀mla svng gø yv́nglún shì we íe.
Mònggv̀n zìlàngré àngni poqpv̀ngwe tvyø nø pvlàcè dang svng téwa dvshatā lúnwe gø íe. We lìpùngmè svng Portugal dvcì kà kèní wáshì nø zàywà tvyø rì svng nø Greek, Latin dvcè kàpv̀nrì kèní shvring shvtà bǿà. Yanǿng ò mònggv̀n zìlàngré àngni kà vgo nø “Mary Arose and Went in Haste” wawe jømciq kaq svng lùò wegø íe.
Weni ò mòngkà svng nø Cardinal taqkèní dvshat we wà bǿà nø vjúrøt tvyø svng nø Portugal dvcì kà taqkèní wáshì bǿì. Vjúrøt núngpà tvyø svng Lesbon, Poland, Chile, Malaysia, Putogal dvcì kàrì taqkèní wáshì bǿì.
Zidòng mok vtoshì we tvyø svng nø shvrúngshú rì àngyá gǿ rvzé nvng mvkún zàywà rì taqkèní wáshì bǿì. We vjúrøt tvyø lvmvng taq Cardinal taqkèní shòlaqré rì svng Yesu Kristu nvng àngmè Mari nø shvngbe nvng tiqdø vlwe dang nvng yadø shòlaqré rì ò noqngø̀m tvyø rì shvngbe nø mòngzø̀l dø wáshì lúnlv́m dang shvmv́n dvgǿn we vjúrøt tvyø svng wáshì lún bǿì wegø íe.