Tvwàn rvzì lvpvng vyøwe tìwàng ò dvzà tìí vláng bǿà wervt cì lawe vsv̀ngrì dí tvrà vdǿn kebǿà we

Tvwàn rvzì lvmpvng vyøwe tìwàng ò dvzà tìí vláng bǿà wervt cì lawe vsv̀ngrì dí tvrà vdǿn kebǿà we Shvngka
Vle á:mì we July 28 ni kèní mvyø̀ shødǿng zaqráì wervt mònglàng tì wàng nø àngwà mvdàm téwa tø̀ng ráì weí we wàng dvzà lòng vrá vláng bǿà. Yanǿng ò mvyø̀ shøtì nø àngwà nǿngrì mvdàm té tø̀ng bǿì. Ziyà dám, tvwàn rvzi svng ngangwe tvrà, mònglàng tì dvzà nø vle á:mì nǿng mvyø̀ taqgø vtì í vláng yv̀ngà wervt mvrìng vsv̀ngrì taqkèní vrá dvcøp:mò nø, vsúyaq kèní gø shv̀m kømrì dvcaqā shaq íbǿì we dvzà lòngnø yanǿng taq vrá vláng bǿà we íe. 
Yani la rvtø̀ lv̀ngcha taqnø móng vsv̀ngrì tvwàn rvzì svng ngang nø cì røng, cì cvprì lavm we rvtø gø íwe taq wedø dvzà lòng vtìí vláng bǿà wervt gvzà yakwe vhǿm bǿà. Tvwàn rvzì svng ngang lv́m dvgǿ shìwe vsv̀ngrì nø yanila taq mònglàng tì bat lv́m rvtø̀ svng cashì nø vdǿn ò we vsvngrì gø mvme vlwe svng shálún shìe. 
Wedø tvwàn rvzì svng ngang we vsvngrì nø nǿng nǿng vrv̀m luqmvn shìwe taq tvrà rì, dvzàrì nvng phone line, Internet line rì màshvla we yaklv́m dangrì gø gvzà vl we írvt móng vsv̀ngrì taqkèní wedang rì svng cvn cvn wáā lúnlv́m svng gø shvrúng nøt vlwe gø íe. 
Wedø dvzà, tvrà rì yakwe rvt móng vsv̀ngrì ò shagóng shiqshàn tvrà nvng sing nø cìróng dí vdu rawe rvtø̀ rì taqgø laqni yvkwe tvrà rì vhǿmshì we dang vtàn lú:ngà we íe. 
Tvwàn rvzì shvnvng vlwe mvrìng vsv̀ngrì nø Pvdó myuq svng zùngmàngrì zùng gv̀:lò we, bv̀nlì tvrà àngpv̀n pv̀n rvt Pvdó svng dìlv́m írawe rvtø̀ rì taqgø 40 rvzé ming rvzì tvrà ngan ràwe írvt gvzà yvkwe gø íe. We rvgaq vlwe móng vsv̀ngrì shvngbe nø tvwàn rvzì kèní lúnshì we dvrè rì taqkèní wa dvkúm shìnø vl we gø íe.