St. Lucy

St. Lucy

Darì mvshǿl rì taq St. Lucy ò àngpè ní àngmè nø Sesilly zø̀nlung, Syracuse taq mvgàm dø̀ngku tiqrvp ku v̀l yv̀ngì wanø̀ yv́nglún shìe. Àngpè nø àng cv̀m lvpat kèní shìyv̀ngì we ínø̀ Lucy nø àngò chø̀myo vjø̀ng lvpat svng Gvray kaq apnúngshì we ínìgø àngmè mèmà mèí mvnoq mvkám we mvgàm cè tiqgǿ nvng dø̀ngku shvzøng shìlv́m dvkámòe. Àng taqkèní St. Cecilia dø mvnoq mvkám we àng døngku pè kaq svng Gvray tvrà dvtanā lúnlv́m dvpvt wanø̀ dvdam shìwe ku kèní dvtú wegø íe.

St. Lucy àngmè nø shvwi tǿng vna í zawe vsv̀ng tiqgǿ gø íe. We vna svng shvzǿm lún lv́m dvpvt àngcè mè nvng (50) ming vrúm we Catania taq vlwe St. Agatha ò dàlv́m nvmik gømla dvtānò we dvgàm kaq svng dì yv̀ngì. we shvrà taq tuqbǿì nø cì lvjáng shì nø̀ vl yv̀ngì. We shvrà taq vlwe dvgvp St. Lucy ò àngmè nøt mvsø̀n taq dvsháza shóngnøt rì bungwe nvng luqmvn shìráì weí àngcè mè Lucy í røt nímshì we zaqshøp rì kaqsvng dvshà vsv̀ngrì kaq tubùm dvbangā we nvng àngmaq kaqsvng vwánā lv́m wawe kà lòng svng gø vto lún yv̀ngà.

Ínìgø St. Lucy kaq svng mvnoq mvkám we mvgàmcè pè nvng dø̀ngku shvzøng lúnlv́m tvrà nø téwa dvkám nø tvnùng vhǿmvtnà.

We rvtø̀ nø Diocletion ngàshà mvdò rì bungnø vtang kèní shvnip shvnvr we rvtø̀ gø íe. Gàmzø̀ koqkápè àngò kám nøt tvrà nø Roma cáng pvrà rì svng noqshì we nø vrv́m vrá we tvrà svng wáshì we nvng móngdàn svng shóngshì we gø íe wanø̀ dvdut shìwe gø íe. Wervt nø Gvray kaq kámwe rvcángcè rì kaq svng shvnip shvnvr nø gvsvt shvmøt lv́m vjøn ráà wegø íe.

We rvtø̀ taqni St. Lucy gø dvshá mvré nvng vtang kèní svre dvké dø shvnip shvnvr vhǿmò nø làngdø̀m taqnø àngò naqtú taq shv̀mí yvqò nø̀ shvtnò we vhǿm yv̀ngà. Wervt St. Lucy àngkaq svng Sesilly zø̀nlung taq vlwe Syracuse móngdàn svng roqgvr we shv̀nshér vsv̀ng wanø̀ bø̀ng shvng ráì wegø íe.

St. Lucy àng taqkèní zø̀nli dvjáng rì, shvwi tǿng vna rì, naqtú nvng vne dvjángrì svng shvzǿmā lúnwe shv̀nshér vsv̀ng tiqgǿ bø̀n ráì wegø íe.