Christmas Bóy àngni (December 25)

Christmas Bóy àngni (December 25)

Sweden móngdàn kèní St. Brijit nø nøngmaq shvngbe ò chv́ngkàngpè shøqlú:ngà we dang nvng singnø̀ àngò yøpnv́ng shø̀ngran tiqlòng svng yadø vtàn ráà we íe. Shvngbe dvgǿ dángbǿà mèpvng àngmè Mari nø hípøt tushì dá:ngí àngò mv́rtaq nvng wur nángshì nø̀ nøtshø̀m nøtløm we mv́r í vjúrøt shìe. Wedø àng vjúrøt shìwe rvtø̀ taqø ni lòngzàpè svng gv̀l lú:ngà nø dàlv́m dø íwe nv̀m svr gálòng nø we lòngzàpè Yesu yv́ngkèní bung lú:ngì wae. We mèpvng muqlàng dvzv́r rì ò vtang shaq ngø̀r we zàywà shaqsv̀ng ngà vnàí tálún:òe. Ngàò koqkám mè nø vtang kèní dvgùng shvring vpǿ we ngór dvgùng gùngshvngrì nvng lòngzà pè kaq shvring shvtàòe. Cv̀mrépè ngǿlv́m dánshì ráì wekvt àngmèí àng puqpǿm svng lùò nø̀ àngò shømløm we mv̀rshv̀m nvng nøt shvlø̀m:òe. We rvtø̀ taq shaqrépè loráì nø̀ køpngǿmshì só:rí dvbù necì í noqòe.

Chø̀myo vjø̀ngmè mari nø lòngzàpè Yesu svng àngpuqwá vdòngø vtoshì lv́m íwe dang svng Esaya 7:14 taq "wervtnø̀ Yehowa àng vdèí ni namaq svng mvsh[lpvrá tiq lòng èzí daqnø̀nge. Eyv̀ngnøng, chø̀myoré vjø̀ng tiq mèí angcè tiq pè rí lú:ngòe. Ang bø̀ng nø Immanuel wa tǿ lú:ngòe" wae. Ezekel 34:23 taq "Wemèpvng ngàí ngà dvzømshú Dawi svng àngmaq mvdv̀m vyv̀ng roqshú zv́ngò nø, a:ngí angmaq svng dvkùm lú:ngòe. Angí ni angmaq svng shvá:mò nø, angmaqò roqshú wáshì longe" wa yv́ngshìe. We døni Ezekiel 34:23, Daniel 9:25 nvng Mika 5:2 rìtaq gø wedang nvng singnø̀ shvng shvng wa vtán shaq íe.

Yesu kristu ò shøq àngni íwe Christmas bóy àngni nø shvngø̀mré ò bóy àngni rì taqkèní nv̀mlat bóy mè àngni tiqni nø møí. Nv̀mlat rvtø̀ rì taqnø Yesu kristuò shøqwe àngni svng January 6 ni taq Mako paqzí vdè rì tuqráì we àngni nvng tiqdø wáshì yv̀:ngì wegø íe. AD 30 nǿng sv̀ng tuqráì wekvt nv̀msvr móng shvngø̀mré rì nvng Roma wamà taq 300 nǿng gøm Christmas bóymè yv́ngkèní gvzà bø̀ngshv̀ng ráì wegø íe. Christmas bóy àngni nø December 25 ni taq ínìgø mònggv̀n shvrà vrv̀m taq nǿngrì mvme vlé ráì we høqshaq rvtø̀ àngni màbóng dø wáshì vdu ráì we bóy àngni tiqlòng gø íe.

Nv̀mlat taq Christmas bóy àngni svng December shvlá vdòng wàlv́m vjøn lú:ngà we àng mvtú nø Roma dvcì rìò nv̀m chv̀ng bóy àngni, Natalis solis invict wawe nv̀m gálòng cáng pvrá shøqò we àngni wawe mvtú kèní gø wáshì yv̀ngì we íe.

AD 604 nǿng St. Gregory vbat svng tuqráì wekvt shvngø̀mré vdòng Christmas bóy àngni taq Missa vjúrøt tvyø svng tiqni vdòng 3 boq wá ràwe dvrá gø gv̀l ráà we íe. We rvtø̀ taqkèní Svrabín koqkám rìò vmíng vkáng ku muqlàng dvzv́r rìò yaqdø̀ng rvwè Missa vjúrøt tvyø Chv́ngkàngpè ò dvciq lvpat shøqwe àngni svng dòngnøt mvsø̀n taq gv́lshì ràwe dang, nìnà kung gømla rì gv́lshì nø̀ St. Major Basilica noqngø̀m tø̀ngnø taq wápv̀ng ráà wegø íe.

Svrabín koqkámpè taqkèní vyv̀ng roqshú rìò Missa vjúrøt tvyø svng vyv́ng rvtø̀ taq St. Agenesia noqngø̀m tø̀ngnø taq wá pv̀ng ráà. We vjǿrøt tvyø nø gálòng dvpvt gálòng íwe vsv̀ngcè shøqlú:ngàwe màná dømrø mvshv́l pvrá tiqlòng gø íráì. 3 boq waboq bóymè vjúrøt tvyø svng St. Peter Basilica noqngø̀m tø̀ngnø taq wáshì yv̀ngì we ínø̀ Christu nø shvngø̀mré vsv̀ngrì ò nøt mvsø̀n dòng taq shøqò we nvng làngdø̀m àngni taq ngór dvgùng nvng vrá tuqlong we svng dvtú we lvjøm kèní wáshì yv̀ngì.

 11 àngyá mvzuq nǿng  nvng 12 àngyá mvzuq nǿngrì dvhø̀ taqnø German Christmas zàywà rì nvng Noel zàywà rì gø mv́n pv́ngshì ráì wegø ínø̀ AD 13 svng tuqráì dvgvp kèní Carol Christmas zàywà wawe vtóng pv́ngshì ráì. 10 àngyá mvzuq nǿngrì vdòng taq nø Christmas bóy yaq taq shǿngwvt, nv̀mpu rì wvt:ne wawe vtóng gø lángshì nø gvzà shvringò we rvtø̀ rì íyv̀ngì. Christmas shǿngtø̀ngrì taq svmi dvgáò we vtóng svng 13 àngyá mvzuq nǿngrì taqkèní pv́ngshì ráì nø̀ welòng hang nø Yesu wurgáng nvng Edin cún svng gømla dvtan wegø íe wanø̀ vtàn ráà wegø íe.