St. Athanasius The Great

St. Athanasius The Great

Athanasius nø Alexander wamà kèní tiqgǿ íe. Àngnø wemà ò bø̀ngshv̀ngwe rvcángcè dø̀ngku tiqrvp kèní gø íe. Àngnø we mamà taqø mònggv̀n paqzí cvnshì nø ring vtangwe nøt cun paqzí rì cvnshì lún yv̀ngà.

St. Athanasius The Great àngnø nøt mvsø̀n shèrnø̀ zitnøt vlwe tiqgǿ gø íe. Àngkaq svng shvrúngshú shvnvp lvpat taqø ni Svrado àngké mvdò ò bv̀nlì àngkàng tiqgǿ ku gø paqzí zíshú ku gø bv̀nlì riwe paqzí vdè tiqgǿ íyv̀ngì.

AD 325 nǿng taqnø Asia Mina Bidinia, Nicheal Council lìpùngmè taq ànggø rúng yv̀ngì we íe. We lìpùngmè taq Arius kaqsvng vtù mvdò wanø̀ vrìng yv̀ngà. St. Athanasius The Great àng lvpat 31 nǿng AD 328 taq Svrado gvbà pè svng Galerian gv̀mzø̀ koqkámpè taqkèní shvnip shvnvr we vdòng shìbǿì mèpvng nø St. Athanasius The Great kaqsvng we Svrado vya kámǎ yv̀ngà we íe.

St. Athanasius The Great àng lvpat (46) nǿng rvtø̀ Arian mvdò rì móng lvmang tvrà taq vjángshì we bung ráì. We rvtø̀ taq Svrado gvbà St. Athanasius The Great svng gø we móng kèní (17) nǿng døp lù:ngò we vhǿm yv̀:ngà. Ínìgø Svradò gvbà St. Athanasius The Great taqkèní nø Catholic shvngø̀mré ò kámnøt tvrà dang taq màdat vcù:ng we bv̀nlì taq dvzaq dvkáng shì ráì wegø íe. Àngkaq svng gvsat rawe ngànshà rì kaqsvng gø vrá vgám gvsat we dang taq dvzaq shì yv̀:ngì we tiqgǿ gø íe.

St. Athanasius The Great nø àng lvpat (76) nǿng taq lvpat béyv̀:ngì nø̀ àng taqkèní shvngøt dvtú vru ráà we "Vsv̀ng shagóng lushì we" wawe kàru bok nø mònggv̀n taq bø̀ngshv̀ng we kàru bok shvlá tiq lòng gø vpo ráì we íe. St. Athanasius The Great í vru ráà we "Arian dvcì mvshǿl bok" svng nø àngkaq svng móngdàn vtánglvp lù:ngò we (3) boq waboq zishèr tø̀mø vru ráà wegø íe.