St. Boniface

Germany móngdànò dvzvŕ shú tiqpè íwe St. Boniface nø AD 673 nøng taq England móngdàn Cregiton taq gvlyàngà. Àngò cvm lvpvt taq kèní Gvray bvnlì taq shóngshì we tiqpè ínø Nursling taq vl we kàgvp núngshú zùng taq paqzí cvnshì bøì mèpvng we zùngò shølshú vgo tiqpè bønlúnì.

Paqzí cvn:a we dvng taq paqzí vdè tiqpè ínø àng taq kèní kàru legabuk rìgø mvme vru yàngà. Kàgvpnúngshú bønbøì mèpvng chyøciq rìtaq kèní Gvray tvrà svng vruònø shvngøwe legarì dvkang yàngà. AD 718 nøngtaq nø Svrabín koqkám Gregory II taq kèní Germany móngdàn vdòng taqø dvbùshvng mòngkà dvshvng lvm vmíng vkáng zíbøà. We rvtø Gvray kaq mvnoq mvkám we vsvngrì kèní shvnshvŕe wa nø noqò we Gudenberg shìgùn mvdàmø yo we shøngtøng svng røm:à yàngà.

We mèpvng vsvngrì nø muqlàng taqlvp kèní mvrà ezílúngìe wa nø vtangshaq svre:vmì we ínìgø mòngzøl dø àngmaqí vl lúnò we írvt àngmaq noqshì tvrànø mvdøng mø:í dárì walòng síngshá vt:nà. We mèpvng kènínø St. Boniface àngò dvbùshvng bvnlì nø tiqni mvdàm tiqni téwa vhánglúngì. Móngdàn vdòng shvràrì taq noqngøm chømrìnvng kàgvp núngshú zùngrì gvzà poqpvng lún bøa. Àngò Gvray tvrà taq dvzaq dvkángshì we dvng svng vpø shvringò weí Svrabín koqkámpè Gregory III taq kèní St. Boniface svng Germany móngdànò svrado vgo vya svng dvng yàngà.

St. Boniface nø àngò làngdøm ngámshì we lvpvt taqnø Nederland móngdàn svng dinø Gvray kaq mvsháò we rvsvngcè rì dvpvt dvbùshvng mòngkà vrá dvshngá:mà. AD 754 nøng Dulkum wamà tiqshvrà taq àngò cvshú mvdò nvng vjúrøt lìpùng wa shìwe rvtø taq ngànshàrì taq lèní shvtinò weí lvpvt béyàngì.

Gvray kaq kám we dvng shvre íwe St. Boniface nvng àngò cvnshúrì svng kømyàngà we shvrà Fulda kàgvpnúngshú zùng taq àng shì mvshì dvgvpø lángyàngà legabuknø shvm damá vcaq we mvtaq àngò shvwi gø vmvtshaq ínø dèni høq gvlò we svng gø shálún shìe.