St. Teresa

Dvbùshvng bvnlì wawe vsvngrì kaq roqgvr we shvnshvŕmè St. Treasa nø France móngdàn Alancon myoq taq AD 1873 nøng taq gvl yàngà. Angnø 1886 nøng Christmas bóy vtoò bóy angni la taq nøt vlíng vpo shìráì weí Gvrayò bvnlì taq vpnúngshì lvm nøtrat shì ráì we tiqgø gø íe. Ang lvpat 15 nøng taqni Svrabín koqkámpèò vko vkáng tiqlòng íwe Papal Dispensation taqkèní maq maq mvdò zùng svng gòng yàngì. Ang kadvgvp gø shønwe kàtaq "shóngnøt kèníni mø:ínì nø dvsháza bvnli wá mvlúnshì" wawe íe.

Angnø nøt tøng nøt døngwe tiqmè gø ínø bvnlì vrvm taq gø tøp tøp wa wáshì we kám vrvm we tiqgø gø íe. Angnø kadø íwe shìwvt àngpvn pvn vhøm møwe ínì gø gvray shvnshvŕ kàru taq zømshì weí jór nvngòn lushì we tiqgø íe. Angnø welòng zùng taq shølshú wáshì ráì dvgvp-ø cipshìwe nøt taqkèní dvzaqshì nø nøngøp kà taqkèní gø chàng laqyà kèní gø gvzà shvla dø dvzaqshì yàngì we íe.

Angí vru yàngàwe The History of a Soul wawe kàru bok taq shvnshvŕ pvlàcè nvng sing nø mvshøl rì dvtøp nø vru yàngà we íe. Angnø kámnøt tvrà taq gønshaq zíshì lvm svng shóngshì we tiqmè ínø pvlàcè chutcháng we bvnlì taq angò lvpat svng núngshì yàngì we gø íe. St. Tereasa nø 1897 nøng ang vsak 24 nøng taqni lvpat béyàngì we íe.

Angbøng svng 1927 nøng taq wángzà mòngrì taq dvbùshvng bvnlì wá dvzaq shì vsvngrì kaq roq gvrwe shvnshvŕ mè wanø mvsat shì yàngì we íe. Ang shønyàngì we taq shvngømré walòng svng ang dvgàng gàng ku vrang shì bøì we íe. We vdòng taq shóngnøt vsor we nvrøm tiqlòng vle. We shóngnøt mvl we la ínìnø dvzvŕrì taq kèní gø dvbùshvng mòngkà dvshvng lvm tvrà mvl long. Wedø tiq dvchá kámnøt tvrà taq lvpat zíshì yàngìwe shvrerìò mvshøl gø shøn tvle lvm mvl long wanø shøn vtàn yàngà.