St. Francis of Assisi

Shvrúng shú jau Seminary zùng svng poqpvng yàngà we St. Francis nø AD 1182 nøng Italy móngdàn Assisi myoq taq gvl yàngà. Angnø vdá mvgàmré taqkèní tiqgø íwe rat cvm lvpat taq kèní dvgùng vl weí mònggvn boy lvm dang taq vlín nø télúngì we tiqpè gø íe. Ang lvpat 25 nøng taq St. Démíyán noqngøm tøngnø taq vjúrøt shì we rvtø kàngpè yesuí angsvng wulgáng mvdàm kèní "vrøn lú:ngì we shvngømré svng dvcøplvm èwaò" wanø dvkám yàngà.

We mèpvng angí dvshá mvhoq vsvngrì kaq góng gwá bèlaqrì nvng pø gvmsùng rì taqkèní dvbangshì nø noqngøm tøngnø rì wá pvng lúngà. We lòng svng yàng bøà we St. Francis of Assisiò angpè nø gvzà shvmná mvgør weí pø gvmsùngrì vrá vtang lvm dvkám mòe. We kat St. Francis of Assisi nø angò gónggwá rìsvng chutnònø yarìnø vpèò dvrèrì íe, vkat kèní nø ngà muqlàng taqlvpø vl pè vpèsvng wa go lvm íe wanø shøn yàngì. Weyáng kéní angnø hí shvnvm màdá gónggwá angbøt nvng vl nø vjúrøt dvzaqshì sórí angò lvpat àngshár svng pvngshì yàngì we íe.

Angmèpvng cvnshú rìnø tiqni mvdàm tiqni luq mvnshì ráì weí yesuí dvkám yàngàwe shvngømré svng dvcøp nø tùbum dvbang shìwe bvnlì taq jór nvngòn lún yàngà. St. Francis of Assisi nø shvrúng shú vya svng kámshì bøì mèpvng dàlvm nvmik gømlarì gø gvzà dvtan lúngyàngà we íe. Angó dvbùshvng bvnlì tvrà taq dvsháza shóngnøt taqkèní shvngømré svng vrang yàngà we íe.

Angnø shagóng láshì we nøtsvng vgám lvm dvpat ràngtúng rvtø taq gónggwá màdá banghøcá rìtaq vdøp shìnø zøngwe rvtø taq tvwàn mvdàmø vl yàngì. Christmas bóy rìtaq longzàpè yesu shøqyàngà we ninà kung hang dvtan we svng angtaq kèní pvng yàngà we íe. Angnø Abyena rvzi taqø nøt shvdøt vjú røt shìwe rvtø taq kàngpè yesuò dammá pu:ngwà lòng svng kámshì yàngì we íe.

Angshøn yàngì we taq ngàò bvnlì døngjá svng nø dvdáng rá:ngà nàmaqí dvtut wàlvm bvnlìrì svng kàngpè yesuí leq dèzøm dá:rnøng wa shønyàngì mèpvng ang lvpat 44 nøng portium myoq taq lvpat béyàngì.