St. Bruno

St. Bruno
Shvnshvŕ vsvng tiqgø íwe St. Bruno nø AD 1030 nøng taq Germany móngdàn Cologne myoq taq gvl yàngà.Carthusian Order wawe carthusian doraq jau mvdò svng poqpvng yàngà we shvnshvŕ vsvng tiqgø gø íe. Angnø shvrúng shú jau vya kámshì bøì mèpvng Rheims wamà taq vlwe svrado zùng taq 18 nøng døp shvngøt shú svra bvnlì ríyàngà. Angí shvngøt dvtúò we zùngmàrì taqkèní paqzí vdèrì gø gvzà vl ráì.
Angò paqzí rìtaq mvnúr nø gvzàmwe rìsvng jór lúnlvm dvpat Seche Fontaine wa tøò we tìbor tiqlòng taq dvrá shvdøk shìnø vlyàngì. We shvrà taq angò lvpat taq wá vléshì yàngì we mvràrì dvpat nøt tønshì weí mvrà dansvng kámshì we ku vl yàngì.

       Angnø we rvgaq taqkèní vcél shì nø gvzà dìlvm tuq lvm yakwe Chartreuse zøngwàng taq vrá vl yàngì. We zømwàng vdòng taqni St. Bruno taqkèní Carthusian doraq mvdò svng poqpvng yàngà we íe. We shvrà taq nø svmarérì bat tut dî mvlúnshì we shvrà tiqlòng gø íe wae.
St. Bruno nø kadvgvp ínìgø heliyet mvrshøm vlpè gø íe. AD 1101 nøng October 6 ni taq Italy móngdàn Calabria wamà taq ang lvpat béyàngì. Angí poqpvng yàngà we Carthusian doraq mvdò nø mòngzøl dø dvrá shvdøk lúnshì we shvràrì taq wàyà:ngà we ínø vsvng shvngbeò vpø shvring we vhøm yàngà.
St. Bruno svng AD 1514 nøng Svrabín koqkámpè Leo (x) pè ban taq shvnshvŕ we vsvng dang yàngà we íe.
AD 1623 nøng February 17 ni taq nø Svrabín koqkámpè Gregory (xv) pè taqkèní St. Brunoò bóy angni svng October 6 ni taq wa lvm mvsat yàngà.
Wedø ínø shvngømrérì taq kèní nøng vrvm wáshì we angni taq nøng maq gø vrvmrìò vléshàì we mvràrì svng angbøng taq kèní Gvray kaq dvtit tvle vjú røtshì shvla we svng gø shvngø tvtú we íe.