Sergey Brin

Google svng mvnò we taqkèní mònggvn taq svté mvgàm tiqpè bøn lúngì we Sergey Brin 1973 nøng August 21 ni taq Soviet Russia móngdàn Moscow myoqø Jú tiqrap taq kèní gvlyàngà we íe.

Angpè nø University tiq lòng taq lèga shvngøt shú svra tiqpè ínø angmè nø nøt sun paqzí vdè tiqmè íyàngì. 1975 nøng dvgvp kèní angmaq rapnø Russia móngdàn kèní dvgá móng svng lolvm dvdam shìyàngì. Pàwálvm wani angcèpè Sergey Brin ò lvpat paqzí dang svng téwa dvháng-a lúnlvm dvpat dvgá wángzà móng svng lolvm dvdam shì ráì.

Angmaq rapnø Jú dvcì tiqrap íwe taq Russia móngdàn vdòng lúnkángrì lún vdu dángte mvlúnò. Sergey Brin ò mèpvng lvpat zìdang vháng lvm vko vkángrì mvl wanø dvdamshì we ínìgø we rvgaq kèní léshì lvm vkáng mvlún yàngò. Wedø íwe vdòng taq dvzaq shìnø 1978 nøng taqnø we móngdàn kèní búngá:mì nø America svng tuq ráì.

We rvgaq kèní Sergey Brin nø zùng rúng pvngshì ráì we íe. Angnø cvmré lvpat taq kèní sunpvn paqzí nvng computer paqzí taq nøt lúmnø mvdaq we tiqpè gø íe. Pàwálvm wani angpè gø we paqzí dang taq shvngøt shú svra tiqpè ínø angsvng gvzà tubùm-a lúnò rat gø íe. Ang lvpat 15 nøng AD 1990 nøng taq Maryland University taq paqzí cvnshì bøì nø 1993 nøng taqnø Computer nvng sunpvn paqzí kèní zùng dáng yàngà. We mèpvng Stanford university kèní gø scholarship zíò nø Doctor bweq lushì lvm dvpat dvtut cvnshì ráì. We dvgvp kèní Internet program rì mvn pvnlúngà we íe.

We yángø ang rvmnvng tiqpè íwe Larry Page nvng vhøm bøì nø ang nvng Internet taq Search engine wawe program tiqlòng svng mvn pvnglúngà welòng svng nø Googol wanø bøng zíò e. Welòngò ang lvjøm nø 1 wawe mèpvng taq 0 rì gvzà vl we svng lvjøm zíshì we íe wae. Welòng Google wawe bøng kèní Stanford website taq 1997 nøng September 15 ni kèní láng pvngshì ráì we íe.

Nvmlat taqnø we zùng vdòngø wa data rìlángshì we taq lángò we yáng kèní mèpvng nø vsvng shvngbe í langshì shvla we tiqlòng íráì. Sergey Brin nvng Larry ní angní lvngà nø 1998 nøng kèní angní ò zùng svng narò nø Google company svng wá pvng lúngà. 1999 nøng mèpvng kèní nø Google langwe vsvng tiqni mvdàm tiqni luqman shìráì weí 2000 nøng mèpvng kaq nø American móngdàn mvtaq mònggvn vsvng shvngbe dvpat zømdang dø kàpvn 72 pvn taq kèní lánglún shì ráì høqshaq vháng lúngì we íe.

2004 nøng August shvlá kèní nø we company ò shares rì nvmpvng lúngà nø angní taq shvng gvmsùng billion ku vdá mvgàm ráì we íe. Google company taqkèní mèpvng kaq nø Google AdSense, Google Book Search, Gmail, Google Map rìsvng vrá dvtut mvnò we mvtaq 2006 nøng taqnø You Tube svng gø 1.65 billion í wan bøà we íe.

2011 nøng taqnø Facebook nvng tiqrá bvli wálún we Google+ svng gø mvn lún bøà. Sergey Brin nø Google company ò bvnlì vgo tiqpè ínø 2015 nøng taq angnø Dollar 29 billions høqshaq vdá mvgàm we tiqpè bøn ráì. Sergey Brin nø cvmré lvpat taq communist móngdàn kèní vtshì ráì nø zìdang vháng vmì móngdàn taq dvzaq dvkángshì weí mònggvn paqzí vdè, svté mvgàm bøn ráì we Jú dvcìcè tiqgø íráì. Ang shøn we kàrì taq, bvnchvt gvbàrì pvran lvm nø bvnchvt cvmrì pvran we mvdàm téwa yùl-e.

Ngàí Google svng mvnò we nø gvmsùng lálvm dvpat mø:í, kvluk tiq damcè enùngò weí angdè lún mèyøwe tvyørì angdè ne lvngpvngø tuqlún lvm dvpat dvdam shìwe íe. Krat cømme wawe tìkwè dømrì nvng bànghø cárì nàlevtnò nøwa jòr lvm tvrà svng tuqlún shì longe wae.