2020 9 shvlá (22)yaq vsháng (6) nari ján rvtø taq Covid bønwe rvtø vdòng taq ínìgø california wamà noqngøm zùng yvng noqngøm lúnshì tvrà vlwe Shvngkà.

2020 9 shvlá (22)yaq vsháng (6) nari ján rvtø taq Covid bønwe rvtø vdòng taq ínìgø california wamà noqngøm zùng yvng noqngøm lúnshì tvrà vlwe Shvngkà.

 

Covid rvtø írvt vgámò we vlnìgø california wamà Sacrament yvng vlwe Cathedrel of the Blessed Sacrament Cathedrel Noqngøm zùng vtáng lvp vzvng lvp døngtám shvnvng yvng shvngømré vsvng rì (100) jan gønø vle v:mì Lvbán nìtaq dvkøm shìnø Vjúrøt dvngí Gvray dvbùshvng mòngkà tãshì lún bøà we íe.

Sacrament rvgaq nø california yvng covid vnà zønli yóga vkøn we shvrà yvng vbáwe rvgaq írvt chøm vdòng chøm vtáng dvkøm shìwe shvngbe kaq svng vgá:mò we íe.

July shvlá tuq ráìke shvdún zìdvng shvyúm dvngí Sacrament svng sarado gvbàpè Bishop Jaime Sotoí shøngàn vtáng lvp yvng missa Noqngøm lvm vkáng zíbøà we íe.

Sacramento sasana kení Lvbán ni Noqngøm Vjú røt dìlvm døngjá svng zvng dvtut vgámò we ínì gø vle á-mì lvbán taq shvngømré vsvng (100) gø dvngtenø Cathedrel noqngøm zùng yvng svng mvrdaq shvná wvmshì dv:ngí tiqgø nvng tiqgø (6') vsvr dø rungnø vshøm dvtvng chøm mvdvm kení Vjú røt, mòngkà tún-a bøà wanø Fr, kení shønò we íe.

Jøng jøng ang nø vháng rvm yvng rvlàng lvm gvzà svre:nge wa shøn shìe.

        Shvngømré vsvng tiqgø íwe Maria Balakshiní angnø gvzà vnvp we noqngøm tøngnø vdòng svng gø gvzà mvrøtnò we ínìgø shøngan vtáng lvp yvng missa kàgvp núngò nø noqngøm wegø Nøtshøm dvbù lvm gvzà lún shìwe mvdvm pvlàcè dvpvt paqzí gø lún shìe wae. Shvngømré Vsvng rìgø vdè nø vdeò kámnøt tvrà nvng døngmvn nø shvngømré vsvng íe wawe svng Aleteia Shvngkà dvp kení shøn we svng shá lún shìe.