(21) ya'mvzuq taq lvpat cvmvtvng Carlos Acutis svng Shansherpè wanø dvngbøā we Shvngkà

(21) ya'mvzuq taq lvpat cvmvtvng Carlos Acutis svng Shansher pè wanø dvngbøā we Shvngkà

Lvngashvré Carlos Acutis nø Gvray vdòngø mà-vl bøì we (14) nøng íbøì.Ini gø angí langra wē shagóng vnàng mvbøt mv-tin ma-gvyaqshì Gvrayo jórnoggun dvtvnò we í 2020, October 10 ni taq Svrabyin Koqkvm Francis í Shansher vsvng wā nø dvngbøā we íē. Carlos Acutis nø Vlē a: mì we 2006 nøng, October,15 ni taq gvray vdongø mà-vl yà:ngì we lvngashvré tiqpè íē. Chvk èshøn longò dvgvp, Angò cvmré lvpat mvshøl svng egun longò dvgvp Angpè nìí cvmré pè svng Gvray dvrá Mòngkà shvngøtna we mà-vl ,we mvdvm angpè ni gø Gvray tvrà taq nønt lømløm gvzà dvzaqshì we mà-vl. Íni, Cvmrépè Gvray dvrá Mòngkà shálvm rvt kàgøí shvngøtnòe mà? Yàgø cvmré nø cvmré dvgvp kèní nìvrvm Noqgu dì nø vkangpè Yesuo kàgvp nóng we tiyø rì taq rvtø vrv'm dì nø cvnshì lúnoe.ni vrvm Rosary vjúrøtnè.lvban vrvm mvrà vchvngshì nø Vkangpè Yesuo (sagramantu) kàgvp svng vtōshì nø kvmnønt tvrà taq gvzà dvzaqshì we tiqpèce íē. Àngme shøn we taq cvmré pè svng yàng nø Ngà gø Gvray tvrà taq cvn shìnø dvzaq shønge, wàe.Yà cvmrepè nø angrì angrvprì mvdvm mònggáng taq vl we vsvngrií kvmnønt tvrà svng vpø shvring nø cvnshilunlvm, vkangpè Yesuo kàgvp (sagramantu) svng shóngnøntni vpø shvríng lvm dvtvnò we Shansher pèce gø ie.

Vrá nø,Vsvngrì í vkangpè Yesuo kàgvp svng vpø shvring lvm cvmrépèí kadø wàoe mà?  Cvmrepè nø dvbushang bvnlì wà we Mongkà shøl shú Svra gø mø-í, Gvray Dvrá Mongkà dvshang nø shvngøt dvtú we Svra gø mø-í? Angí dvtvn bøā we tiqlong yvngshi we nø, yàdø íe. Yalong nø nøngmaq nvng nitvp we social media kèní tiqdvtvng mònggáng rvgaq yachvng svng vkangpè Yesuo kàgvp sagramantu svng shóngnøntni vpø shvríng dvzvr long íē.Angjeju rvt chøm vdòng taq Shiqshan tvrà mv-lunò we zà rì, shaqré shaqtvngrì gø vkangpè Yesuo kàgvp (sagramantu) yvnggø vjùrøt shìnø nònggun lùshì shvlāe. Àng lvpat mvnggá nø pàlong íe ma?  Àng shøn yvngì we Kà tiqlòng nø rvmnangò nønt mvsøn svng vkoq dvzvr we vlē"Ngà lvpat taq gvlshì we mvnggá nø vkangpè Yesu nvng vzømvzvp lvm long íe, wàe.Angbøng rvt shìrà e wàni gø ngà nønt byō ngè wàe.pawalvm wani Gvray kaq mà-lé Shi lvm rvt tiqminitce gø rvtø màdvzømo wàe. Ngao lvpat mvnggá nø Mvnpe Gvray vdòngø dvciqciq Cunshi nø tvndvga ni shøtshu dvnglunce vl-lún lvm móngdvn írvt nø Ngà eshøq we shvrà gø muqlang móngdvn íe.vkangpè Yesuo kàgvp sagramantu nø muqlang móngdvn svng góng dvzvr we tvrà ie, wanø svkse kvm shì bøì we íē.

Angò computer svng kagø'í lvnglvm wawe taq? Carlos Acutis nø computer paqzí gvzà mvdàq we lvngàshvré tiqpè gø írvt vkangpè Yesuo kàgvp sacramentuò jórnoggun wawe Websites tiyø tiqlong svng angí puqpvng bøā we íe. Yà long website nø mònggáng rvgaq yachvng nø vkangpè Yesuo kàgvp tiyøo nvmlat nvmpvng àngké dvbúngò we website tiqlòng gø íe. Vsvng shvngbè nø vkangpè Yesuo kàgvp svng vpø shvríng lvm nønt vl rvt nø angò website svng mvnggá tiqlong gvlshì nø puqshi bøì we íe. Carlos Acutis nø vkangpè Yesuo kàgvp sacramantu svng gvzà Vpø shvringo nø àng cunshì dvgvp Shvngømré kèní Shansher e wanø mvsvtò we shvràrì svng dì lún høq dvzaqshì nø vjúrøtshì yangi. Lvngàshvrepè Carlos Acutis shìvmi mèpvng angí lvngya: ngà we computer svng yanglongà dvgvp angí lálúno we website rì nø vsvngrì Gvray kaq kvmnønt vl lvm , kàgvp dang svng lalun lvm rvt lvngya:nga wanø shø:noe.

Wervt Svrabyin Koqkvm Francis í shølò nø October (10) ni Italy móngdvn,asisi myoq taq Shansher we vsvng wanø dvngbøā we svng shálún shìe.

 

 

Add new comment

1 + 0 =