"Afghanistan dvpvt Vm aq vnvtshì nø vjúrøt lvm rvt svrabín koqkvmpè Francisí dvkvm we Shvngkà"

 "Afghanistan dvpvt Vm aq vnvtshì nø vjúrøt lvm rvt svrabín koqkvmpè Francisí dvkvm we Shvngkà"

 Afghanistanò myoqdō gāpuql nvmbøngshø wángø bù:mì dvpoq bøā mèpvng Afghanistan taq vtù vrè vsvngrì nārshìlvm rvt vm aq vnvtshì nø gvzà vjúrøt dvzaqshì lvm dang  svrabín koqkvmpè Francisí August (29) ni lvban ni anjelus vjúrøt lìpòngme, Dvzvr (st).piter Noqngøm wáng tøme taqø kømrà íwe shvngømrérì kaq svng dvkvm bøā we íē.      

   Gāpuql nvmbøngshø wáng nø vlē a:mì we August (26) ni taq gvsat wē vhøm bøā. Svrabin Koqkvmí nø Afghanistanò àngdvja svng dvdàm nø gvzà gónggì we íe. Afghanistan móngdàn móngzøngcerì nvng tiqdø nønt dvshà we íe.  Vkvt dø bū:m dvbòt ò rvt Vsvng mvmè shìbøì.  We dang nvng sing angrì shvngbeí gø tiqdvshàqí vrashì nø dvbvng shìlvm , mvreza nøntni mongzøl lòng svng wálúnlvm , àngnī angnvm tiqdø vllúnlvm nvng móngdànò vzàng lap mongzøl lúnlvm rvt vlømshì ra zí nø dvzaq dvgvngshì lvm rvt dvkvm bøā we íē.
Vjúrøtshì we nvng Vm aq vnvtshì lòng ínø mongzøl lòng lún dvzvrè. 
(Prayer and fasting engage us)

   Vkvt dø íwe mvshøl meyvngrì taq nøngmaq nø àngde nvng mvsing dø vl mvdaq. Yadø íwe dvja taq nøngmaq rvzvngcerì taqkèní tiqlòng lòng wálúnlvm,dvtvn lúnlvm rvt røtnemshì we íe. Yalòng bvnlì dvja nvng singdø Svrabin Koqkvmpè ku mvsing ra dø vl mà-shvla. Gvzà vchvk we rvtø íe. Wervt vjúrøt dvbvng mvdòrì taqkèní gø vjúrøt we taq dvzaqshìlvm , Vm aq vnvtshìlvm, mv-rà chut dvbvng lvm rvt dvkvm bøā we íē. Svrabin Koqkvmpè ku dvbvnglvm rarì, téwa nø svmaré rì nvng cvmrérì kaq svng vlún dvngtè lvjangà nø tùbùm dvbvngshi bøì rì kaq svng gvzà oqā wàwe dang shøn bøā.      

   Vlē a:mì we (8) shvlá (5) nī gø Afghanistanò mónglvmvng nvng singdø gvzà Nønt dvshalvm vhømò we dang Svrabin Koqkvmpè taqkèní shøn bøā we íē. Pàwálvm wani nø móngdàn vrvm taqø cil gvrlò we American cildvp rì a:tvngò weò  Dālìpat vtù vrèrì ínø móngdànò mvzvn svng poqpvng bøā we íe. svrabín koqkvmpè ínø àng nvng tiqdø vjúrøt lvm nvng lvknak me,lvknak mvzøcvm shaqrì nàrshì lvm rvt shvboy taq dvmvn vrashì nø móngdàn Mongzøl lvm dvpvt shvlá vtvng mvtúrì svng lá lúnlvm rvt røtnemshì bøì we íe.