American President íyv̀ngpè Donald Trump kaqsvng shvtlv́m vjønò we mvdàm Vatican kèní tvnùng kàru

American President íyv̀ngpè Donald Trump kaqsvng shvtlv́m vjønò we mvdàm Vatican kèní tvnùng kàru

14.7.2024 ni taq President àngshv́u rvcànglv́m móng vsv̀ngrì nvng lìpùng mvngushì we rvtø̀ American President íyv̀ngì we Donald Trump kaqsvng shvnvt wv:pmò nø̀ shvtlv́m vjøn bǿà we mvdàm Vatican kèní tvnùng kàru shvlvngvtnà we íe.

Yadø vsv̀ng shvt lv́m vjønò we bv̀nlì nø Democracy móng lvmvng svng gø vtøp gvyaq dvzv́rò we mvtaq vsv̀ng lvpat svng gø shí dvzv́r we bv̀nlì ni íe.

American Svrado àngké mvdò kèní gø American móngdàn ò shømløm, mòngzø̀l lv́m tvrà, dammá lún bǿà we American President íyv̀ngì pe Donald Trump nvng móng vsv̀ngrì shvngbe shømløm mòngzø̀l nø shagóng shiqshàn lv́m dvpvt vjúrøtā lv́m íwe dang wedø mvrø̀ we bv̀nlì nø cǿm vnǿn lv́m tvrà svng bǿn dvzv́r we dang tvnùng bǿà wegø íe.

American móng Svrado àngké mvdò kèní gø móng lvmvng tvrà taq kadø íwe mvrø̀ we bv̀nlì svng ínìgø vgám ràwe, yadø íwe bv̀nlì rì kèní Party mvdò svng gø vtù we bǿn dvzv́r sháò we dang tvnùng bǿà we íe.

Jø̀ng jǿng taq Svrabín koqkámpè Francis nvng Donald Trump maò vzø̀mwe bv̀nlì rì taqnø nøt màrá we vtoshì we tvrà rì màbóngwe gø vlwe íe. Kàshvbóng 2016 nǿng Svrabín koqkámpè Francis Maxico móngdàn kèní zaqlè tvrà di dvgvp mònggv̀n yv̀bv̀n vsv̀ngrì kaq dvsháza vjúrøtā we wáā yv̀ngà we íe.

Svrabín koqkámpè Francis kaqsvng we rvtø̀ taq Donald Trump kaq mé (Vote) zí daqe má wa røtkà røtòe. Pàwálv́m wani Svrabín koqkámpè Francis taqkèní mònggv̀n yv̀mbv̀n vsv̀ngrì kaq American móng kèní vto nø tubùmā lv́m røtnímāò we ínìgø Donald Trump taqkèní àng President bø̀nlong kèní nø yv̀mbv̀n vsv̀ngrì móngdàng svng mvgòng lv́m dvpvt vgámlv́m íwe dang dvkám ráà wegø íe.

Svrabín koqkámpè Francis taqkèní àngkaq svng vtànò we taq dvzà vrang lv́m màdvdam shaq waqhám mvng vranglv́m dvkángshì we  vsv̀ngnø rvcángcè mǿí we dang, Gvray mòngkà taqgø wedø màbá we dang ínì gø àng President bø̀nlongwe rvtø̀ rì taq wedø íwe bv̀nlì rì svng nø shvláwa dvtøp ràlongwe dang vtàn yv̀ngà wegø íe.

American móngdànò President móngøp shú vya svng Donald Trump vtoshì bǿì mèpvng Svrabín koqkámpè nvng gø Vatican taq vhøm yv̀ngì we íe. Wemèpvng trump taqkèní vtànò we taq Svrabín koqkámpè Francis ínø̀ àngnvng vhøm bǿshà mèpvng ngàkaq svng mònggv̀n cømcaq mòngzø̀l lv́m lv́m bv̀nlì svng dètú bǿngà wanø̀ gø vtàn ráà we íe.