August shvla taq vjúrøt lvm ang mvtú Nøngmaqò "Shvngømré dvpvt”

August shvla taq vjúrøt lvm ang mvtú Nøngmaqò "Shvngømré dvpvt”

 August 3 nì, Lvbán 2 yaqò Vadican shvngkà dvp kèní dvshv:ngò we taq, Svràbín koqkám pè August shvla taq Vjúrøt lvm íwe angmvtú gø vbáè. "Church on the way” Shvngøm dvpvt wawe kà vgò zishì we íe. Svràbín koqkám pè Francis, we kà vgò nvng tiqdø, Shvngømréò bvnlì angmvtú rìtaq Shvnshér pàlàcèí dvshvt we nvng tiqdø dvzaq shìlvm wàì: Vjúrøt we, àlū kèní nøtløm we, dvzøm dvbvng we, ap nóng weí shvngømré taq dvzaq shìlvm dvshvt we íe. Shvngømré vdùng taq vbá wenø Svsana bvnlì taq dvzaq shìlvm dvkáng shìlvm dvpvt íe; Shvngømréò " identity” svkse angmvtú íe. "Evangelization” Svsana vháng lvm dvzaq shìwe íe wa, Svràbín koqkám pè Francisí hàng sùmlà video message taq kèní dvshv:ngò we íe.                    August shvlá dvpvt Svràbín koqkám pè Francisí, Shvngømréò bvnlì angmvtú rìsvng dvdvm nø Shvngømréò svkse washì lvm nvng Svsana bvnlì nø lvpvt vháng wedø tiq dvchá cvnnø angmvtú angshér svng dvzøp nø dì ràwe íe. Welòng nø Gvray shóngwám shìwe tvrà dang svng cvn weí Nøngmaqò lvpvt taq nìvrvm súnshì ràwe íe. Shvnshér pàlàcèí tvrà dvtú we kaq cvnshì dvzaq shìlvm vchvk we íe. Shvngømré nø lvpvt vram yatwe bvnchvtrì dvhø taq dìwe svng dvdvm lvm wàì.

   Shvngømré nø vsvksún shìwe írvt, yatwe dvhø dìwe íe. Shì bøì we rìdø mví nø, bvnchvt pvn vrvm dvhø taq sún shìwe íe wanø Nvngùn zìwe íe. Svràbín koqkám pè Francisò Vjúrøt we dang svng, taqrá mvngù shìnø Mòngkàn vrvm vdoq vtip we "Network” tvrà dang kèní nìvrvm vjúrøt dvzaq shìlvm dvshvt we íe. Nøngmaqò Shvngømré dvpvt vjúrøt dvzaq shìlvm wàì; Wekvt nø shvnshér pàlàcèò jejú kù:ngà nvng à:ngò góng svng ang dvbù shàng mòngkà gálong nvng vpø vnvp dø dvdøpmò nø shvdøng shvngàng lúnlvm íe wà, Shvngømréò dvpvt nøtløm weí vjúrøt lvm nøngmaq gø vrvm svng dvshvt we svng Vatican shvngkà dvp kèní dvshvng bøà we íe.

Kàtvlíng Polo Hpu Ye Dwe.

#vaticannews