Brazil mo´ngdàn kèní lvpat 104 nǿng íwe shaqré tiqgǿ tìløp kámshì bǿì we

Brazil mo´ngdàn kèní lvpat 104 nǿng íwe shaqré tiqgǿ tìløp kámshì bǿì we
Catholic shvngø̀mré nø Catholic shvngø̀mré cèrì svng shøqbǿò we mèpvng tiqlvbán vdòng tìløp kámā we íe. La càmré nø shagóng mvshiq shànwe ínìnø we mvdàm téwa lvwan dø kámā we gø íe. Pàwálv́m wani moshi dvrá taq wedø dvtú yv̀ngà we ínø̀ Yesu Kristu gø shøqbǿà mèpvng 8 ni wani taq rvmøl vtóng cv̀nlv́m àngni gø̀ ráì kvt, àngmè góng taq shini mv̀vl dvgvp kèní muqlàng dvzá:rí bø̀ng vtǿshaq í dø tiqdvchá àng svng Yesu, wa bø̀ng tǿòe. Moshi dvrá taq vgvnshaq dø dvshàn dvshérshil[m àngni gø̀ ráì dvgvp, àngní nø cv̀mré pè baqò nø Gvray kaq shvrúngālv́m Yerusalem svng ngāngá:mì. Kadø íe wani, vkàngpè dvrá kàru taq, vlat gà:lò we lvngàré pè vrv̀m nø vkàngpè svng shvrúnga ràe, wa vru yà:ng/. Kàngpè dvrá taq kuqcøl tiq shvgøp, mǿíni kaø cè vní go shrúnga ràe wa vshǿnshaq dø tiqdvchá àngni[ Gvray kaq shvrúngaòe. Wanø̀ Luka 2:22-24 taq vru yv̀nga. 

Íwe vle á:mì we shvlá vdòng Brazíl móngdàn taq vsvk 104 nǿng íwe shaqré tiqgǿ kaq svng tìløp kámā we wáshì bǿì. Àngbø̀ng nø José Lourenco da Silva wanø̀ tǿshì pè gø íe. 
Tìløp kámshì we Scramento svng June 17 ni taq Alto Piquirim, Parana taq vl we noqngø̀m tø̀ngnø taq kámshì lún bǿà we gø íe. Àngnø lvpat vsvk tébǿì we ínø̀ àngwà rvtø̀ rì taqnø Scramento jejú gømla svng àngciq ciq kámshì ràwe ínìgø àngkaq svng nø tiqrvtø̀ vdòng shvrúngshú tiqgǿ taqkèní kámā bǿà wegø íe. We Scramento jejú gømla rì svng kámā bǿà we shvrúngshú pè nø Antonio Murilo Macedo da Luz íe. 

Yadang nvng sing nø shvngø̀mré vdòng taq vtang kèní dvbùlv́m íwe dang July 13 ni taq vtàn lú:ngà wegø íe. Shvngø̀mré vjúrøt kàru bok mv́r 1213 gø̀m taq wedang nvng singnø̀ tìløp kámshì wenø nøngmaq shvngbe ò mvrà rì svng dvshérā we íe. Wekvt Gvray àngmv́r taq vrá tiqkvt èshøqì we ínø̀ nøngmaq nø Yesu Kristu ò dvcìrì íráshà. Shvngø̀mré ò àngcǿ àngcè rì gø íráshà we íe. Gvray dvbùshv̀ng mòngkà svng dvshvng we vsv̀ngrì gø íráshà wanø vtán shaq íe. 
Brazíl móngdàn nø mònggv̀n taq Catholic shvngø̀mré luq vtang móngdàn tiqmóngdàn gø ínø̀ móng zøngcèrì àngmaq gø Catholic shvngø̀mré vsv̀ng ku vl lúnwe dang svng vtangkèní dvgùng vl dø vtoshì we íe.