"Brunai móngdvn rvgaq kèni nvmlat Cardinal lúnò we dang"

"Brunai móngdvn rvgaq kèni nvmlat Cardinal lúnò we dang"

October (25) ni taq Brunai móngdvn ò svrado Cornelius Sim ínø àng taq kèní màdvdvmō we shvngkà tiqlòng tálúnòe. Welong Shvngkà nø tuqdaq we November (28) ni taq Cardinal (13) gø svng vrá dvnglvm íē wa dvtá a:tna we svng shálún shìe. Yarì Cardinal (13) gø taq Brunai kèní svrado tiqpè gø vbá we íē. Svradopè shøn we taq, shvngkà yalòng tuq lvm svng ngàí bvttut mv-lvno.vkvt høq Shaq mvkvm. Íni gø Shvngømrérì dvpvt nø gvzà nònggwøn lùshìlvm Shvngkà íē. Pàwálvm wanì Vatican kèní Brunai móngdvn taq vl we shvngømré rvzvngcerí mvdvmø gvzà nàpø íwe svng shálún shìe.Wervt mònggang nvng singwe sasvna dvbushang bvnlìmè taq shøtshú dvnglunce vl-lún dvzvr we dang íe, wanø shøn bøā.

Svradopè svng (2004) nøng taq Svrabyin Koqkvm John Paul (ll) kèni àng svng sasvna bvnlì angkang Ku bvnlì dvlé ò nø, mèpvng nøng taq Brunai móngdvnò nvmlat svrado bøn lòngì.Brunai móngdvn nø nvmshvr Tipo Ashaq móngdvnrì kèní móngdvn cvm vtvng tiqlòng gø ínø, Muslim dvcírí téka vl we móngdvn gø íe. Vkvt dø Brunai móngdvn svng vpø shvring nø mvsat ā rvt svradopè chepkeni svràbyin Koqkvm svng gvzà oqā wakà shøn bøì. Pàwálvm wanì catholic Shvngømré vl wē mà-shàò sasvnarì svng vkvt dø mvsat nā rvt íe. We mvdvm kvmnønt tvrà taq gvzà nøntlúm nø nònggwøn vl rvt gø íe.

Svradopè shøn we taq, nøngmaq nø górtòng kèní górtòng taq v-lìe. Nøngmaqò sasvna nø gvzà cvmè. Iní gø nøngmaq nø shvlá dø dvbushang sasvna bvnlì wà íe. Dvbushang sasvna bvnlì svng gvzà Vpø ínø Gvray kaq svng kvmì we dvcí gø íshàe. Yakà nø shøn màdū we kà gø íe. Ínø gø sasvnamè nø nøngmaqò angmè íe wanø dvbù nønt ní dvtvn we gø íe. Covid 19 Zønlì rvt svradopè nø Vatican kaq dì rāwē dāng lìpong svng gø, Cardinal Vyà zì we lìpong svng gø dilvm, mà-dì lvm chvk shìni mà-sháshì. chvk èshøno ni, yalòng lìpong svng Shvngømrérì dvpvt Shvngømrérì mvrdvng taq wáshì nìnø téshvlā nø vtù wē bvnlì gø íe wàe.