"Budapest nvng slovakia móngdànrì kaq svng dvbùshang Sasvna bvnlì tvrà Pàmvràce dì bøì nø Gvray àngme Medo kaq svng Oqā we dang"

"Budapest nvng slovakia móngdànrì kaq svng dvbùshang Sasvna bvnlì tvrà Pàmvràce dì bøì nø Gvray àngme Medo kaq svng Oqā we dang"

         Svrabín Koqkvm Francis nø Hungary nvng slovakia móngdànrì kaq svng dvbùshang Sasvna bvnlìrì rvt dì bøì mèpvng vlē a:mì we September (15) ni, lvban vshøm ni dørøm rvtø taq dvrá shvdikshì nø Vatican kaq svng Pàmvràce tuqlòng íwe íe. Svrabin Koqkvmpè Francis nø køni móngdàn kaq dvbùshang Sasvna dì bøì mèpvng Vatican svng tuqlú:ng jvng, mø-í ni mèpvng tiqni Gvray àngme Meri taqkèní tiqdvtvng Gvray kaq Oqā wàwe tong laqya shvlá vlē.         

       Oqā wàwe svng angnønt vdòng taqkèní wā mø-í . Gvray àngme Meri kaq svng àng ni dì nø Oqā wanø shvgunò we íe. Àng nvnnvn dì we noqngøm chøm nø Roma myoq taq vlwe bacílìgáme (4) vbi lòng taqkèní tiqlòng íwe St. Merry meja ( Medo Mari Noqngøm chøm me) íe. Vkvt tiqboq gø àngí àngwa dvnungò dø tiqdvchá Roma Vbibi saìya nvmbøngshø chøm wáng kèní léshì lú:ngì dvgvp dvrá shvdikshì we Noqngøm chøm svng zà'ngwa mvdì nø Medo Mari bacílìgá Noqngøm chømme kaq svng dì nø Medo pvlin mvdvmø shøngwvt nvmpu wvtce tiqhøng svng Vlu zíshì nø , Yalòng dvbùshang Sasvna tvrà nvmlat, rvwe, lvngdøm Pàmvràce vta:ng lúnlvm dvpvt Oqā wanø vjúrøtshì bøì. 

      We pàdø svrabín Koqkvm Francis nø Maria Salus Populi Romani (Salvation of the Roman people) Roma myoq Vsvng shvngbe kaq svng ròqgar we Medo) ò sømla hvng mvrdang yv'ngø tiqlvng rip nø vjúrøtshì we dang, we dv'ngí Vatican kaq svng lōa:mì we dang Vatican Shvngkà dvp ròng kèní shálúnshìe.

    ‘Maria Salus Populi Romani’ sømla nø svrabín koqkvmpè màha Gregory Sasvna svng dvnungshì we rvtø taq (590) nøng rvtø nila Roma myoq svng lvngdaqā nø Vpø shvringò we Medo Mari sømla hvng íe. mvshøl mà mv-svtshi we rvtø svng esùnò nìnø yalòng sømla hvng Roma svng lvngò nø vpø daqa yà mvdvmø téwa vlébøì we íē.