Cømsaq mòngzøl nø vrvm vrá lvm dang nvng cøpnøt vlvm dvpvt Rvsángcèrì nvng tiqdø vhøm mvngu shìlvm Muslim shølshú rìí dvshvt we shvngkà.

Cømsaq mòngzøl nø vrvm vrá lvm dang nvng cøpnøt vlvm dvpvt Rvsángcèrì nvng tiqdø vhøm mvngu shìlvm Muslim shølshú rìí dvshvt we shvngkà.

 

Svrabín koqkám pè Francisò Iraq móngdàn dvbù shvng dìwe taq móngdàn vrvm taq vlwe muslimsrìí nøtshøm dvbù we svng vtò lún bøà we íe, wae.

March shvlá (6) nì taq Svrabín koqkám pè Francis nø Iraq shìyà Muslims shvngømré shølshú vgopè (Grand Ayatollah Alial-Sistani) nvng vhøm nø vtoqvtip shì bøì we íe.  

 

Mvdvm taq shvngømré shølshúrì nvng vhøm nø vtoqvtip shìwe mvdøng nø Muslims móngdàn gvbà (2) móngdàn nvng vrvm vrá lvm dvpvt tiqdø vhøm mvngu shìnø

vtoqvtip lvm wawe Svrabín koqkám pè Francisò Svsvna bvnlì svng kømzøp dvzvr bøà we vtoqvtip we dang íe wanø America taq vlwe Muslims rìí dvdvm lún bøà we íe. 

 

" wedø lúnshìwe rvtøkaqsvng nøngmaqí màtòò we ínìnø mvpvng dvpvt kadvgvp gø yàdø vjú vlwe rvtø svng lúnlvm nø mv-vl we íe, wae. Mvdvrá we tvrà dangsvng vgvm lúnlvm,

Cømsaq mòngzøl nø vrvm vrá lvm nvng cipnøt té vlvm nøngmaq vrvm té nøt vløm shìnø mvngū shìlvm vchvk we íe. Iraq Muslim shvngømré shølshú vgo rìnvng Svrabín koqkám

pè Francisò vhøm nø vtoqvtip we svng móngdàn vrvm taq vlwe muslims nvng Rvsángcèrì dvpvt gvzà vjú vlwe cømsaq mòngzøl we tvrà dangsvng lúnlvm íe wanø America shìyà

muslims shølshú vgopè íwe (Sayyid Muhammad Baqir Kashmiri) í, shønò we íe.     

 

Yakà svng táshì, sháshì rvt mònggvn dvpvt shøn mvtøm shìwe angmvtú svng lálún bøà we íe. We dv:ngí vzàng bøn bøìwe vzìvrùng bvnchvt rìnvng yvt vtvng we mvshøl rì vlbøì we

ínìgø, Cømsaq mòngzøl nø vrvm vrá we lún lvm dvpvt vtoqvtip dvmvn weí ang mvtú láò we taq Iraq móngdàn nø no.(1) móngdàn íbøì we íe

wanø Rome Reports shvngkà dvp taq kení shálún shìwe íe.

Photo courtesy of: Rome Reports/youtube

 

Add new comment

2 + 0 =