Cardinal Bo taq kèní mvpnøt nvng màdu màbóngwe tvràrì rat gvyaq shìráìwe Hpakant lungsíng mo nvng singnø mvrà shvri vtnàwe shvngkà.

Cardinal Bo taq kèní mvpnøt nvng màdu màbóngwe tvràrì rat gvyaq shìráìwe Hpakant lungsíng mo nvng singnø mvrà shvri vtnàwe shvngkà.

July 2 ni taq Hpakant longsíng lá wàng taq rvgaq vdøl we taq lvpat zíshì bøìwe 200 gø dángte nvng singnø "yalòngnø mvpnøt taq kèní màdvrá dø wawe vsvngrì rat nø bøn we íe" wanø Cardinal Charles Maung Bo taq kèní mvrà shvri nø shøn tvnùng bøa.

Àng shønwe taq "shìv:mì we svngrì nø rvgaq vdøl nøwa mø:í màdvrá dø shvnip shvnarwe gø íe" wanø July 4 ni taq shø tvnùng bøa.

Asia móngdàn svrado àngké gomidi (FABC) vgopè Cardinal Bo kaqsvng Svrabín koqkámpè Francis taq kèní "mòngàn taq dvshà mvhoq vsvngrì mvdàmø wulaq bvnlìrì nvng làngcharì taqø vréshìwe mvwà lvm" wanø dvkám shaq íbøì we íe.

Yadø Coronavirus yóga zønli vkøn we rvtø vsvngrì svng yóga vgám lún lvm dvpat chøm taq wa vl dvzvŕ nø vgámì we ínigø svré mvshì lvm dø poqwá svng nø vgám mvlúnì. Company rì taqkèní yadø dvshà vsvngrì kaq àngmaqò lòngsíng lá wangrì taq lá dvzvŕò we í yadø nøt yul lvm bøn dvzvŕ bøa.

Yadø zønli vkøn ráìwe rvtø vdèò wulaq bvnlìrì gø gvzà søm vnønv:mì. "Yadø vdè móngdàng vsvngrì lvpat gvzà søm bøìwe nø Gvray í vdè móngdàn zaqshøprì svng vdu vbóngdø lángshá lvm svng gø shvdøm we íe" wanø dvkám bøa.

"Móngdàn taq vmíng vkáng vlrì taq kèní dvsháza nøt vl nø vdu vbóng dø mvwàò dángte nø yadø bvnchvtrì dvtut bønlvm wa ílonge" wanø vsúyaq svng tvnùngò we mvtaq "ya vdè móngdàn zaqshøprì nø Gvray í shvngbe dvpat shèmvnaìwe zaqshøprì íe. Mèpvng kaq yadø íwe yul lvm vhøm laq màdu ra" wanø shønbøa weíe.

Gø vrvmò wulaq bvnlìrì wàv:mì we taq làngcha svng gø roqgvr shì ràwe svng shvdøm bøa we íe.

Myitkyina svradopè Francis Daw Tang taq kèní gø yadø bøná:mì we nvng singnø gvzà nøt mvbyo lvm íwe svng tvnùng bøa we íe.

"Ya móngtaq dvshà mvhoq vsvngrì dvpat téwa tùbumshì rà v:mìwe svng gø shá dvzvŕ we íe.

Myanmar móngdàn vgo wáshìwe Daw Aung San Suu kyi kèní yàdø bvnlì màdáíwe vsvngrì dvhø nøtyul lvm vhømbøa we mvdàm mvrà shvri we kà "yarì nø mà dvráwe vdòng taq pø lavmrì íe" wanø shønlúngà we svng yáng lúnshìe. United Nations taqkèní nø ràwe dangrì taq tùbum nø dvbang shìlvm tvlú dvgø shìwe svng shálún shìe.

Translate #LiCAS.news