"Cardinal cārá kaq vsvng jvk hvngí kwézìt lvjang nø dvbanbøā we Shvngkà"

"Cardinal cārá kaq vsvng jvk hvngí kwézìt lvjang nø dvbanbøā we Shvngkà" 

Cardinal Robert cārá Vaticanò Noqngøm tvrà rúng bvnlì angkang taqkèní nàrshì bøì wè cardinal tiqpè gø íe. àng nø yà shvlá shvrlaptaq svkí svng kwézìt shi bøì. Vkvt dø kwézìt ā we svrāwøn nø Vsvng mø-í Jvk hvng íe. Yalòng Jvk hvng svng Da Vinci wa tøòe. Yalòng Paqzí svng (2016) kèní pvngshì nø Reggio Calabria taqø lvngbøā. Jvk hvng i kwézìt shi bøì wē svrāwøn kèní July (29) nī taq shøn Kà nø cardinal nø cì ròng yv'ng (15) mvzòng bøā mèpvng July (27) nī taq cì ròng kèní lo longì.

Cardinal ku Reggio Calabria cì ròng svng rvzvngshì we mvtu nø mvmè vl we íe. Cì ròng, lvjangò we, dvzøm we dang gvzà shvla rvt íe. Wervt vkvt dø Sasvna meò shølshú Kvba tiqpè taqkèní vlømshi nøntní rvcvngshì lúnò lòng nø cì ròngø dvzømshìrì dvpvt gø gvzà nonggùn lùshì ra íe. Vlē a:mì we lvban (3) nī svrawønrìí Shvngkà dvtøp boy taq kwézìtshì lòng Aung a:mì we dang, Jvk hvng Paqzí svng oqā wàwe dang Shvngkà dvshvng bøā we íē. yalòng Jvk hvng svng American company tiqlòng taqkèní wà bøà nø, Jvk hvng svng svkí nvng singwe yóga rì, rvshú nvng singdø yóga rì, dvrē nvng singdø yóga pvnrì svng kwézìt lvjangà we Jvk dvrērì vzáng shaq íe wanø shønòe.

Lvpat (76) nøng vhøm bøì we cardinal nø African cardinal rì taqkèní lvpat, Bvnlì dvtdán téwe cardinal tiqpè gø íe. Cardinal nø bvnlì taqkèní nàrshìbøì nigø wávdùrì svng vto nø vshvt (shvlá vdòng zvndvttut bung vdù we wá vdù we bvnlìrì mvmè vl we dang shá lúnshìe. àng nø mejukoyì taq vshvt shvlá (1-6) ni høq wàlvm íwe (32) baq wabaq zilvngré àngnī boy kaq svng gø dìlvm íwe dang vle a:mi we lvban taq Shvngkà dvkang bøā we íē. àng nø Hangery móngdàn, pudabvtmyoq taqø (9) shvlá (5_12) nī høq wàlvm íwe(52) baq wà baq Vbibi saí yā Kà dvgvp congret lúmrì dvpvt Missa Kagvp Noqngøm rvtø svng gø shøl lvm ílongè.

Cardinalò bvnlì angkang Reggio Calabria kèní Italy vsvngpvn dvcì Lorenzo Festicini ínø, Istituto Nazionale Azzurone ò Vgopè íe.

Istituto Nazionale Azzurone taq urobaqø gvzà mvdaq we zidvng taq vl we svrawønrì, gvzà rvzaq we kwézìt bvnlìrì svng gø Mongzøl dø wálúnshì bøì we svng July (28) nī Shvngkà Kàru dvtøp boy taq cì ròng bvnlì angkangpe Festicini í shøn bøā. Kwézìt we bvnlì taq vbá we svrāwøn Domenico Veneziano ígø Jvk hvng nø kwézìt we taq gvzà diqjaq we dang, angwa kwézìtshì mvdvmø téwa nøntshøm lvm ra íwe dang, dàmmá zøm gø yor we dang Shvngkà Kàru dvtøp boy taq shøn bøā we íē. Svrāwøn mvdoò àngké rúng bvnlì angkang shvrúngshú gvba Giulio Cerchietti ígø cì ròngò dvbvngshì lòng svng shvgunòe. Pàwálvm wani zidvng, jvng we, síngá we nvng vp núngshì nø wáā we bvnlìrì gvzà shvlae. Ya dang rvt nø cardinal nø téwa vlømshi nø yalòng cì ròng taq lvjang shì bøì we íe. àngì Kàru tiqgøm vruò we taq longzapè Yesuò Dvndā tereza angò dvkvm Kà íe. We lòng dvkvm Kà nø " shóngnønt ninø nà svng yà shvrà høq eshøl bøì". Cardinal nø yalòng Mongkàò àng lvjøm svng chaqdvp vtoshì lún bøā.

Cardinal svng oqā wà nø, cardinal dvpvt gø cì ròng taqkèní dvzømshúrì ígø vjúrøt dvbvng lvm íe wanø Kà shvdiq zíshì nø shøn bøā we íē.

#rvarvwangservice

#rvapastoralcare #rvanews #cardinal