Cardinal Charles Bo i Hong Kong nvng Miwa Mong dvpvt Vjurxt lvm dvmvno

"Hong Kong Mongdan mvldvm, Miwa Mong Vsuyaq rii dvmvno we dvra nx mvdxng mvmvn we dvra ie wa nx" Cardinal Charles Bo i shxno long svng CBCM-OSC shvngka keni shalun shie. 

Miwa Mong Vsuyaqri keni, Hong Kong Mongdan svng vlevmmi we June lvngdxm niqtaq dvra dvshvtno long nx, Hong Kong dvpvt mongzxl mvvl we, madvra we, Mongdan vsvngri kaq gvyaq mvnshi dvzxro we long ie, wa nx Cardinal i July 1, 2020 niqtaq shxnoe. Vra nx, 1997 nxng dvgvp, Miwa nvng Hong Kong vrashi we lega svng gx vgvmo long i we svng gx shxno. 

Hong Kong nx, Asia nvng Urobaq Mongdan ri vdong yvng, tvra vlwe Mong i dx tiqdvcha, Asia dvpvt ishxt mong gx ie. Wervt nx, vde Mong svng vde Vsuyaqri xp lunlvm dvra vl rae, wa nx Cardinal i shxno. 

Vde mongdano dvra vl we long nx shvla we ie. I ni gx, dvga Mongdan i we Hong Kong svng xp lunlvm rvt, dvra dvmvno long nx mvjo we long ie. We long nx, Hong Kong dvpvt nonggwon yxmdvzvro tvra ie, wa nx gx shxno. 

Miwa Mong vdong yvng, Kristan rio kvmnxnt tvra, Dvbu Shvng Mongka dvshvngo we tvra, noqku we bvnli ri svng lutlut lvtlvt wa mvluno long gx gvza nxnt mvbyo lvm tvra ie. Wervt nx, Hong Kong Mongdano lutlvtkwit (Freedom) svng vgvm mvdaq, wa nx Cardinal i dvmvnoe. 

Vlevmmi we nxng dvgvp, Hong Kong yvng svndaqbyaqo tvra ri, vsvng 9000 dvngte svng tvpmo tvra ri gx vl yvnga. We dx marvm mara we tvra ri mvvl lvm dvpvt nonggon zi mvyxnge, wa nx shxno. 

Wervt nx, Hong Kong dvpvt gx, Miwa Mong dvpvt gx vjurxt dvbvng lvm wai. Angmaq tiqmongdan nvng tiqmongdan vpxo tvra, vtoo tvra nvng vrvm vrashi we tvra vl lvm dvpvt gx vjurxt dvbvng i wa nx Svrado Gvba Cardinal Charles Maung Bo i dvmvno we svng CBCM-OSC shvngka keni shalun shie.