Cardinal Charles Bo taqkèní tuqrawe vsúyaq rvsvng boy taq dvdam nø síngshá lvm dvkám we shvngkà

Myanmar móngdàn svrado àngké vgò Cardinal Charles Maung Bo nø tuqrawe November shvlá vsúyaq rvsvng boy mé záng lvm íwe taq vdè móngdàn mònzøl lvm svng dvdam nø mé zángshì lvm mvdøng vchyak we svng tvnùng bøà we íe. Àng taqkèní Catholic shvngømré vgorì svng shvngømrérì kaq svngpvn vko vkáng nvng vháng we móngdàn bvnlì døngjárì taq Democracy tvrà nvng vbóng dø wálún lvmrì kaq svng rvsvng nø mé záng-a shálvm dvtú ràwe svng dvkám bøà. Democracy tvrà wawe taq mòngdàn vsvngrì shvngbe nø sho sho wa vbá lvm nø gvzà vchyake. Yadø móngdàn øpshúrì svng rvsvng we (Elections) rvtø vzømìnø nøt vrámì we nø rvtø yangúng mòngdàn mòngzøl nø vrám vrálvm tvrà íe wae. Àng dvtut shønwe taq shvngømrérì taq kèní nø mòngzøl we dang svng wa tùbum shìwe wa íe. Shvngbeò nøt mvsøn taq wedø nøtrìzángshì ràe, nàmaqí èzáng nøng we mé taqkèní Democracy wawe àngshí àngwvt svng lún lvm nø nøngmaq shvngbeò tvnù mangá íe. Yàlòng svng lún vdu á:mì wae. Móngdàn vdòng taq vzivrùng wawe taq kèní dvcì cèrì dvhøtaq dvshà mvhøt lvm rìwa vkøn we vdòng taq vlrá shà we svng vgám lún vdu á:mì. Móng dvcì cèrì taq vko vkángrì lún lvm dvpat dvdam shàì nø shølshú party rìsvng mé zang shàì. Móngdàn zaqshøprì taqkèní dvshà mvhoq vsvngrì nvng mvluq mvtamìwe dvcìrì dvpat vjú zí mvwá shì dángte nø møngzøl lòng mvl longwe svng síngshá rae. Cardinal Bo taq kèní dvcì cèrì kaq ka mvdò nø shvngømrérì nvng dvcì cèrì svng vdu vbóng dø roqgvr lúnò e ka mvdo nø móngdàn zaqshøprì svng vmupá:mò we svng dvdam shá rà á:mì wanø shvdøm we íe. Vle á:mì we nøngrì mvme taq vdè móngdàn svng gvzà dvshà mvhøt lvm vhøm dvzvŕ we màná dømrø mvshølrì taq kèní cvnshàì nø nøt tøng nø paqzí vlwe, móngdàn vháng lvm dang nvng mòngzøl lòng svng shóngshì nø dvzaqshì lún we shølshú vgorì svng rvsvng laq lúnì. Yóga zønli àngpvn pvn vkøn we , dvshà mvhoq we, vzivrùng wawe, vko vkáng dvchiqwe nvng móngdànò paqzí zìdang svng vnøn dvzvŕ we rì svng vgám nø jór lún we shølshú vgorì svng rvsvng laq lúnì wanø tvnùngvtnà we íe.