Catholic shvngø̀mré lìpùngmè àngké mvdò ò bv̀nlì àngkàng

Catholic shvngø̀mré lìpùngmè àngké mvdò ò bv̀nlì àngkàng

Cardinal Mario Cardinal Grech taqkèní lìpùngmè poqpv̀ngwe vto mòngkà taq “nøngmaq shvngbe tiqdø zaqlè tvrà dìlv́m tvrà svng cvnshàì we vsvngrì íshàe wanø vtàn lú:ngà we íe. Téwa Catholic shvngø̀mrémè kèní vsv̀ngrì ò kà shaqrì svng táā nø̀ dvdamā lúnlv́m nvng kà shaqrì kèní màtánwe tvràrì svng gø vchvk mvdøngku dvdamā lúnlv́m dang kø̀mngǿm ráì we gvsa rì kaqsvng nònggwòn zinø dvkám bǿà wegø íe. Cardinal Grech taqkèní tiqdø zaqlè tvrà diwe shvngø̀mrémè nø vsvngrì ò kà táā shawe shvngø̀mré íe wawe dang kèní we lìpùngmè svng mòngzø̀l dø nvng jòr dø wálún lv́m nø vyv̀ng roqshúrì shò shò wa dvbáshì lv́m dang taq cvn longwe svng shvdǿm nø vtàn bǿà wegø íe.

Wewa mvtaq tiqdø zaqlè tvrà svng die wawe Synodality ò døngmvng we bv̀nlì tvràrì nø shvngø̀mré vsv̀ngrì nvng vyv̀ngroq shú bv̀nlì riwe vsv̀ngrì dvhø̀ dvløt we ku mǿí nø̀ àngmaq dvhø taqsvng vzø̀mwe dang, àngmaqò bv̀nlì døngjárì vdánglún jórlún lv́m tvrà dvpvt tvrà tóngshì we dang vtàn bǿà wegø íe.

Cardinal Grech taqkèní “ shvngø̀mrémè vdòng taq tasvng dvmv̀nnø vrashì, mvngushì we nø Yesu Kristu ò dvbùshv̀ng bv̀nlì wawe ò døngmvnwe tvrà wawe íe” wanø shǿn vtàn bǿà.

Làngdøm taq Cardinal Grech nø vsv̀ngrì ò kà táā lv́m vchvk we dang shǿn vtàn ráà. Shvngø̀mrémè svng øpshølwe shv̀shér pvlacè Gvray àngò kàsvng tawe nø “Gvray àngkà tawe shvngø̀mré mè íe. Wanø vtàn bǿà wegø íe.

Cardinal Grech nø we lìpùngmè svng kø̀mngǿm ráìwe gvsarì ò nøt mvsø̀n svng dvshvtā lv́m nvng nv̀mbat 3 tut wawe shvngø̀mrémè dvpvt Gvray àngí tvrà tánāwe we tvrà svng cvn dvgøm lúnlv́m dvpvt shìlòng svng jór lúnò we Yesu Kristu bø̀ng taqkèní dvzaq shìwe gø íe.

Shvngø̀mré lìpùngmè ò Commission kèní Svramè Christna Kheng taqkèní gø we lìpùngmè nvng singnø àng taqkèní dvtøp lúnwe tvrà svng vtàn lú:ngà. Àngshø̀n we taq ya lìpùngmè kaqsvng kø̀mngǿm ráì we gvsa krønmvnrì shvngbe nø vdè dè ò síngrv́l nøt rì svng shvng shvng wa shǿn vtàn lún ràwe dang dvmvn bǿì we íe. Àng dvtut shø̀nwe taq ya lìpùngmè ò nøt vrá kàciqrì nø lìpùngmè vdángvm we rvtø̀ taq vrìng kàru dvkang lv́m wawe døwa mǿí nø̀ vdè dè ò shøngran yøpnv́ngrì kaq svng dvyø̀ wun lv́m, dvbùshvng bv̀nlì dang taq téwa dvzaqshì lúnlv́m vdè ò dvdam shø̀nran nøtrì vtán lv́m kámnøt kù:ngàrì zílúnlv́m, tasv̀ng vzø̀m vzvp lúnlv́m tiqgǿ nvng tiqgǿ kèní cvnshì lúnlv́m dvzaq shìràwe dang vrushøp 32 gø̀m taqkèní shúnshìnø vtàn bǿà.

Yalòng lìpùngmè nø dvdam dvtøpshì ràwe lìpùngmè tiqlòng íwe taq shv̀shér pvlàcè Gvray kaq svng gø zǿm shvngángshì lv́m dvkámwe gø íe. Yadang nvng singnø̀ Kajistan móngdàn kèní Apostolic Administrator Fr. Anthony James Corcoran SJ kèní dvkám we gø íe.

Svrabín koqkámpè Francis ò dvtúwe kàru íwe “ chvpdvp lvpvt taq dvbùshvng mòngkà dvshvngwe” wawe kàru mv́r 51 taq kadø íwe dangrì nø Gvray àng móngdàn ò àngshí àngwvtrì bǿnlúnwe, kadø íwe tvràrì nø Gvray àngò dvdamnøt rì svng vtøp dvzv́rwe dangrì kaq svng dvtøp shìràwe dang vtàn bǿà wegø íe. Wedang nvng singnø̀ shvrúngshúpè Father Anthonio kèní dvtøp nø vtàn bǿà wegø íe.

Shvrúngshúpè Father Clarence Devadas taqkèní gø FABC Synod Task Force kèní dvtú we kàru shøprì dang vtàn bǿà. Father Clarence taqkèní we kàru shøprì nvng singnø̀ kø̀mngǿm ráì we gvsarì kaqsvng síngshá lv́m nvng dvtøpnø̀ vrashì lúnlv́m vrìng bǿà.

Shvrúngshúpè Father Clarence taqkèní we kàru shøprì nø Asia móng vsv̀ngrì ò kàshaqrì, àngmaqò shvrúngnøt rì, shø̀ngran yøpnv́ngrì, àngmaqí vhǿm:òwe dvshà mvhøt lv́m tvràrì íwe dang shǿn vtàn bǿà wegø íe.