"Chandā mvring taq Covid zønlì vnā vkøn we rvtø Noqngøm zong boy rì svng gø sher dø Pongøp shvrúngshúpè taqkèní wa wàò we"

"Chandā mvring taq Covid zønlì vnā vkøn we rvtø Noqngøm zong boy rì svng gø sher dø Pongøp shvrúngshúpè taqkèní wa wàò we"

August shvlá 15 ni nø ,Gvray àngme Mari Muqlàng kaq svng gv'ng we vtvng we boy angnī kvba ínø yalòng boy nø Mandalay Catholic gaíchuk Sasvna, zitgaítaí shwePo kvyaì , Yèú myoqnē , Chanda mvring taq kèní vyá nøng vlé ráì we Gvray àngme Bøng zíshì we Noqngøm chømò boy angnī kvba gø íe.

Yalòng boy mè svng nøng vrvm, shvngømré tóng dvrá dvla, V-nyā mvring tóng krìng taqkèní gvzà shvla dø wàò nø vrum rvgaq taq vl we shvngømrérì chøm vsvngrì vdè rvgaq svng tuqlún nø Døngku vsvngrì,. angrì angrvprì vhøm we bōymè tiqlòng gø íe.

August shvlá 15 ni, Gvray àngme boy nø vnā zønlì yóga vsher we rvtø taq í vtù rvt angwa nøng dø boy svng wá mà-lún nigø shvngømrérìò pvlàcè dvpvt shvrúngshúpè Fr, Rìtchvt Kyaw myó lìn taqkèní wā vlún dø dvzaqshì nø Noqngøm vjúrøt we wáshì bøì.

Gvray àngme boy Missa Kagvp nóng we Noqngøm rvtø svng Vsháng 6:30 rvtø taq Mongkà kèní dvshvt nø Shvngømrérì kaq àngde vl we chøm kèní Missa Kagvp Noqngøm rvtø svng lúmlvm dvpvt Kà dvté Jvk taqkèní Gvray Mongkà svng dvshvng bøā we íe.

Missa Kagvp nóng we Noqngøm rvtø dv'ngí shvrúngshú, dvzømshúrì nvng Gwáyā mvkun zaywace mvdòrì í Modo rì taqkèní dvrí shì nø Vkangpè Kà gvp shór lòng nvng Gvray àngme Mari hvngrì svng shvngbe Modo (4) chvng taqkèní dvríshì nø wàò we taq Shvngømrérì àngde chøm vzàng vngvmlap kaq léshì nø mvdøng shvmvng we jèjú ìshøt svng vtoshì bøì.

" Nøng vrvm wàò we bōymè svng angwa dø wá mvlún, vnā zønlì rvt vkvt dø zìmsà dø wáshì lòng nø nønt mvsøn vdòng Shan mv-wà we dang, íni gø Shvngømrérì dvpvt dvdvmà nø pvlàcè kvmnønt tvrà dvpvt vdù vbóng dø dvgø'ā we shvrúngshúpè kaq gø gvzà oqā wàì. Yalòng vnā zønlì rì taqkèní Myanmar móngzøngcèrì shvngbe tiq dvshaqí bvnlvm, lutshì lúnlvm rvt nī vrvm yà vrvm vjúrøtshìe wā shvngømré rvzvngce tiqmè taqkèní gø svkse wáshì nø shøn bøì."

Chanda mvring nø Catholic rvzvngcerì téwa nø Pvyit Ji mvring ínø Darì dvgvpmò zaqshøprì yv'ng lún we Noqngøm chøm me íe.

Vlē a:mì we vnī lvban 3 lvban vdòng, Covid vnā zønlì yóga rvtø vdòngø shvngømrérìò shiqshan tvrà rvt nøntbùm ra vchvk we zigvnrì gvlshì we nvng rvtø svng yèl nø lvjangà we dvnungà we shvrúngshúpè svng gø mvring vsvngrì taqkèní gø gvzà oqā wà bøì we íe.

# rvarvwangservice

# shvngømréshvngkà

# credit

18 August 2021