Christian vsvng 340 Millions gø dángte dvki vrè we vhømòwe shvngkà

Christian vsvng 340 million gø dángte dvki vrè we vhømòwe shvngkà

Open doors wa tøò we mvdò rì taqkèní gùn dvtøp bøà wetaq mònggvn taq Christian vsvngrì dvki vrè we vhømòwe móngdàn 50 móngdàn vlwe svng vtànvtnà. We gùn dvtøpwe taq Christian vsvngrì kaq dvki vrè we nø vle vmì nøngrì mvdàm 60% dángte vháng mvnshì ráì wae. Yadø bønráì we àng mvtúnø Nigeria nvng Saha rvgaq mvgong móng taq vlwe Africa móngdànrì taq mvjànrì luqmvn shì ráì rat íe wae.

Christian rìsvng téwa dvki vrè we móngdàn nø North Korea móngdàn íe wae. Noqngøm nø vjúrøt we ínìgø, gvray shvnshvŕ lèga svng yàng bøò we ínì gø tvpmò nø tung shvrúngò we mvtaq shvtnò we høq vréshìe. Yanila taq North Korea móngdàn vdòng Gvray kaq kám vsvng 30000 gø dángte tvpmò nø tung taq rung we svng shálún shìe.

Wewa mvtaq Sumalia, Afghanistan, Livia, nvng Pakistan móngdànrì taq gø kám vsvngrì kaq mvdøng mvdaq kámnøt tvrà taqkèní gvléshì dvzvŕ we mø:íni shvtnò we 2 dang kèní dvki vrèò we wàòe. Open doors mvdòò vgomè Christian Nani shønwe taq yadang svng èyàngvtnò dvgvp gvzà ni nøt yòl lvm vhømìe.

Tiqmaq taq pvlàcè kámnøt nvng singnø mvrìng wamà køp gvyaqāò nø lùngò we rìgø vhømòe wanø vtànvtnà. Wedang taq Christian vsvngrì nvng dvsháza mvdòrì taqkèní lúndángte nø tubùm dvbangā we svng yánglún shìe. Open doors mvdò nø Christian rìdvhø taq dvsháza bvnlì wawe ínø móngdàn 60 rvzé taq vlwe mvdò tiqlòng gø íe.

Vle vmì we 2 nøng vdòng taq India móngdàn vsvngrì 100000 gø dvpat vm-aq lvm dangrì nvng vllvm chøm dvgø rìsvng dvbangā lúnbøà we ínø tuqrawe nøngrì taq nø tasvng dvsháza shóngnøt kèní tasvng roqgvr kéì we ínìnø yadø dvshà mvhøt lvm rìsvng shvyúmã lún lúngìe wanø vtànvtnà we íe.