Christmas bóy svng lajøm vldø wàlv́m Svrabín koqkámpè Francis í dvkámwe.

Christmas bóy svng lajøm vldø wàlv́m Svrabín koqkámpè Francis í dvkámwe.

Svrabín koqkámpè taqkèní dvtúwe taq àng vtóng vldø tiq dvchá yabóy svng kám vsv̀ngrì shvngbe í shvri:ngò wegø íe.
Yanǿng dvpvt tuqráì we Christmas bóy kaqsvng kadø wá vduwe dang Svrabín koqkámpè Francis taqkèní dvkám wetaq “pàwálv́m wani Catholic Sasvna kèní Christmas bóy kaqsvng pvlàcè kù:ngà lushìwe bóy tiqlòng ku wálún lv́m dvpvt ya shvlà nv̀mlat lvbán kèní ni dvgǿ shìwe íe. Wedang sv̀ng vzànglvp kèní tvlú dvgǿshì we tvrà wanø shǿn lúnshì we íe.

Wedø dvgǿshì we taq December 17 ni kèní nø tvpníshì we dvgǿshì tvrà wanø mvsat shìe. Wedø Christmas bóy dvpvt dvgǿshì we nila taq vjúrøt mòngkà mvngushì we tvyørì kèní wá dvzaqshìe.
Wedø Christmas bóy sv̀ng lvjøm vldø chvpdap wálún lv́m dvpvt Svrabín koqkámpè Francis taqkèní dvkám we tvrà rì nø nøngmaq shvngbe dvpvt yvk we tvrà tiqlòng nø møí. Nøngmaq taqkèní nǿng vrv̀m wàì we tvràrì ni íe.
Àngí dvkámwe dangrì nø
1. Dvshà mvré íwe vsv̀ngrì kaqsvng tùngdi nø nøt shvlø̀mwe mǿí ni Phone dvmv̀n nø vtoqshìwe èwàò.
2. Vsvk tév́mì nø svrǿngwe vsv̀ngrì záyv̀ng vhǿ:mò vsv̀ngrì kaqsvng di nø nøt shvlømwe èwàò.
3. Dvshá mvré vsv̀ngrì kaq svng tubùm dèba:ngò.
4. Mvrà chutwe èwàò, tiqdá vsv̀ngrì kèní gø mvrà chutālv́m èrøtshì. Vsv̀ngrì nvng shvlawe vtoq vtip tvrà wáshì nø vdèò shvránrì svng gø èwaqò. Pàwálv́m wani ya rvtø̀ làngcha taq vsv̀ng shvngbe nø yvkwe shìwvtrì dvhø taq vlwe vsv̀ngrì wa íe.
5. Vjúrøtshì we tvrà taq dèzaqshì, Gvray yv́ngkèní gø mvrà chutāwe jejú sv̀ng èrøtshì. Yadø wáshì wenø kám vsv̀ng tiqgǿ kení Lòngzàpè Yesu nø rvgaq mvdàm tuqrawe nø nøngmaq shvngbe dvpvt íwe mvtaq vdè tiqgóng gø vsv̀ngrì dvpvt íwe svng dòngnøt mvsø̀n kèní kám nø rvwvl nøtrì taqkèní Christmas bóy sv̀ng wá dvzaqshì ràwe íe. Yadangrì sv̀ng cv́n dègømnøng wanø Svrabín koqkámpè Francis taqkèní dvkám wegø íe.