Covid 19 yóga dvjáng vgám cì túò wenø dvsháza shóngnøt bvnlì tiqlòng niíe wanø Svrabín koqkámpè Francis taq kèní dvtú we

Covid 19 yóga dvjáng vgám cì túò wenø dvsháza shóngnøt bvnlì tiqlòng niíe wanø Svrabín koqkámpè Francis taq kèní dvtú we

Gvray àngò dvsháza shóngnøt svng oqà wàì. Mònggvn vsvngrì shvngbe vrvm vrá nø dvzaqshì we yáng kèní ya rvtø Covid 19 yóga vgám cì mvn lúnshì bøì we íe. Svrabín koqkámpè Francis taq kèní vsvngrì we Covid 19 yóga vgám cì túshì lvm gø nvngòn zinø dvkám we íe.

Wedøni America móng svrado Gvbà rì taqkèní gø Svrabín koqkámpè ò dvkám kà svng vtoò nø tiq dvtang vrá nvngòn ziwe gø íe. Svrabín koqkámpè Francis ò dvsháza shóngnøt wawe mòngkà tut taq Covid 19 yóga vgám cì túò wenø dvsháza shóngnøt bvnlì tiqlòng niíe.

Téwa dvshà mvhoq vsvngrì dvpat dvbangā we íe. Vsvngrì gø vrvm taq àngdèí dánglún we kùngà zìdang taqkèní tubùm dvbangā ke lúnlvm vjú røtnòe wanø dvtú bøà. Covid 19 yóga vgám lúnlvm nø àng, vdè tiqgø vrvmò bvnlì døngjá íe wanø dvkám we íe.

Yadang nvng sing nø Covid 19 yóga vgám we council taqkèní shølnø bvnlì wawe gø íe. Ya mvdò nø vsúyaq nvng singwe mvdò mø:í we mvtaq vsvng mvngpòng mvdòrì dvhø vjú vmyvt lavmwe mvdò gø mø:í. Dvsháza bvnlì taq vsvngrì kaq tubùm dvbangā we mvdò tiqlòng niíe.

Ya mvdò nø nvmbat 2 mònggvn mvjàn rvtø taq poqpvng yàngà we mvdò íe. We mvdò í covid 19 yóga vgám cì túshì lvm vchyak we dang dvkám we ínø we mvdò svng øpshøl werì nø American móngdàn móngøp shú vgo àngshárì íe wanø shálún shìe.