Covid 19 yóga zønlì dang vru òwe Svrabín koqkámpè Francisò dvkang kàru

Kàgø ígø mà dvda:mì nø mvlán dárì rvtø taq yadø mònggvn taq Covid 19 yóga zønlì vkøn ráì. We vzàng kaq mònggvn vsvngrì angdè gòng angdè vgám lún shàìe wawe nøt gvl shìlòng svng yalòng yóga taq kèní shvtin bøà.

Mònggvn móngdàn vrvm taqkèní angdè nø angdè sháshì dø vgám dvzaq shìwe ínì gø shvngbe vzøm we nvngòn kèní vgám we dang mvwáshì we svng yalòng zønlií shvkse dvtànvtà. Mònggvn taq vtoq vtip nø vzøm lúnwe vhángwe paqzí angpvn pvn vlwe ínìgø yalòng svng shvla dø wá mvlúnò.

Zønli yalòng zøvm kvtwa tòniò vl shaq dvrá svng téwa shvla walvm dvdam shàì we ínìnø mvkok nøt mv vlì we nvng vbóngvme.

Rvmøt naqí mø kébøà we bángkà vcøt shaq mònggvn yachàng

Yadø mònggvn taq zønli dvjáng vkøn ráì rvtø taq mònggvn vsvngrì shvngbe nø shø tiq lòng taq tiqdø zúnshàì nø zaqlèwàng dìì we zaqlè vsvng wa íshà nø yadø íweshìwvtrì dvhø yaq tasvng síngshá kèlóng shà.

Tiqgø svng wa chutcháng nø tùbum shì màshvlá á:mì. Tiqnøt tiq mvyùng wáshàì nø vzømì we taqkèní tasvng dvbang kélvm rà vchyak á:mì. Mònggvn shishàn dap WHO kèní vtànvtnà we taq zønli vgámwe cìsvng móngdàn tiqlòng taq wa tú nø dvgá móngdàn rìsvng chøm vdòngø wa vl dvzvŕ we gø bøn mvdaq.

Yadø íwe rvtø taq Remdesivir dø íwe cì shvlárì India móngdàn nvng dvgá móngrì taq mvnlún lúngà we nø gvray jejú tiqlòng ni íe. Nøngmaq gø vrvmò cúnshàì we lvpat taq bvnlì tvyørì, rvmánzøngrì, shvrúng nøt rì taq nøt vyuqì we taq pà taqkèní gø vgám mvlúnò wawe nøt mvsønrì mvjò ráì, shvngbe nø tínshá, gvyaqshì sháò we basha rì íwe svng yalòng ya zønli mvrumè taqkèní shèdøm bøshà.

Angdè tiqgóng wa ídøm shìwe, nvrøm dvbumshìwe rì svng chuqgurì nø shvngbe nø vnvm vchangrì íshàwe svng síngshá dvzvŕ we íe. Tasvng rvwing we laq mvwá shàì. Bò bò shvlá vtang mvtú rì lá dvzaq shàì. Yalòng dvjáng zønli vhømì we í yak lvm shìwvt angpvn pvn vhømì we rvtø taq nøng maq svng Gvrayí pvnmán yàngshà we angò mvnggá svng gø dvdam shàì.

Yadø íráì we nø Gvrayí nøng maq svng dam èzíì we mø:í, nøng maqnø tòniò dvrá svng vré shàì rat tòniò dvráí dam zúshì ráì we íe wanø gø chapdap shøn mvlúnì. Pvn vrvm nø Gvrayí pvn mán we dvrèrì wa íratnø tiqlòng nvng tiq lòng nø vdu vbóng we dvrá taq vlwe ínø ya pvnmán dvrèrì shvngbe nvng mvsing wanø gø shøn mvlún shì.

Vsvng wawe nøng maq basha rìtaq angdèò mvshøl mèyàng svng yùl yùlcè vná sháìe. Yalòng zønli zøvm mèpvng nøngmaq taq vlì we ídøm shìwe nøt, shádøm shìwe nøtrì svng gurìnø Gvray taq mvngushàì weí nà, nàmaq wawe kà tvle nøngmaqò wawe kà vdòng taq wa cúnshì laq lúnì.

Ya dvjáng zønli taq kèní pà tiqpvn cègø wá mvlún, cvnshì mvlúnì wawe mvshøl tiqlòng laq mvbøn dvr. Tasvng mvkok we wáshàì. Vsvng tiq mvdò, tiq mvzuq taqkèní wa mònggvn svng øp vmwe ínì nø mònggvn yachàng nø tin lvm lvp svng vpo longe wanø tvnùng kàru taqkèní dvkám bøà.

Add new comment

19 + 1 =