" Covid zønlì dvjáng vkøn nø Vshé lòng zidvng vháng rvt Vkangpè Yesuò Ka dvgvp taqkèní mvring kaq svng tvríshì nø vjúrøt sorí shvmvn we"

" Covid zønlì dvjáng vkøn nø Vshé lòng zidvng vháng rvt Vkangpè Yesuò Ka dvgvp taqkèní mvring kaq svng tvríshì nø vjúrøt sorí shvmvn we"

(5.8.2021) Myanmar móngdàn vdòngø covid 19 zønlì yóga dvjáng vshøm baq wa baq bøn longì rvt ni vrvm Vsvng shì we shìpvn gø vháng mvnshì we svng Shvngkà rì taq yv'ng lúnshìe.

Wervt téwa nø vsvng mvngushi lòng svng vyáshì lúnlvm Catholic shvngømré Sasvna taqkèní gø Noqngøm chøm rì svng tiqlang nārshì nø online ku Missa Kagvp Noqngøm rvtø svng gø wáshì we íe. Myanmar móngdàn Catholic shvngømré àngké rúng kèní gø August shvlá (3) kèní (18) høq mvdøng dvgvngshì nø vjúrøt lvm dvpvt mvzvtbøā we íe.

Vkvt dø mvzvtbøā mèpvng Sasvna mvdò tiqmaq taq nø angmaq mvring vdòng vkangpè Yesuò Kà gvp taqkèní gvwan nø shvman weí ìshøt zíò we svng yvnglún shìe. August shvlá (5) nī Vsháng rvtø taqgø Mandalay Gaíchuk Sasvna, Chan da gú:ng koyaq Rosary Gvray àngme Mari Ukzuq vdòng taqø Kagvp taqkèní ìshøt zíòe wanø shálún shìe.July (31) ni taqgø Mandalay Chóng ywà wàwe mvring taq gø Kagvp mì ìshøt zí lún bøā we dang shálún shìe.

Gwurwang øp Shvrúngshúpè Fr.Kyaw Tu taq ínø " mònggang taq covid zønlì dvjáng vkøn nø Vshé yor we (3) baq wa baq vgám weí pvlàcè lap taqgø nonggùn vllvm July (31) ni dørøm (3) nari rvtø taq shvrúngshúrì shwe yu ya Vzvng kaq vl we st. Piter,mepvng st. Paul , Tìnī st. Thomas, st. Augustine yø vrvm taq vlwe chøm vrvm rì kaq svng gø dì nø vkangpè Yesuò Kà dvgvp dvtán nø ìshøt zi bøā we dang, Dvtán Kàru (91) svng røā nø gø, Covid 19 zønlì vshøm baq wa baq svng kvmnøt tvrà taqkèní vgám nø cúnshì lúnìe"wā chú:ngyúdā Sasvna øp Shvrúngshúpè taqkèní svngpvn v-toq v-tip we mvr taq vrù shaq íwe svng yvnglún shìe.