Cv̀mré góng dvjáò we bv̀nlì svng vtoò nø̀ nònggwòn ziwe vsv̀ng kaq University kaq goò we Professor svng bv̀nlì døngjá kèní dvjáò we

Cv̀mré góng dvjáò we bv̀nlì svng vtoò nø̀ nònggwòn ziwe vsv̀ng kaq University kaq goò we Professor svng bv̀nlì døngjá kèní dvjáò we

American móngdàn kèní Catholic University tiqlòng taq Professor pè svng bv̀nlì dø̀ngjá kèní nvr bǿà we íe. Pàwálv́m wani cv̀mré góng dvjáò we bv̀nlì svng vtoò nø̀ nònggwòn ziwe vsv̀ng kaq we University svng goò nø mòngkà shǿn vkáng zíò wervt íe wae.

We University ò shølshú vgopè Peter Kilpatrick taqkèní vtànò we taq Cv̀mré góng dvjáwe bv̀nlì svng nònggwòn ziwe mòngkà shø̀n we kàshaq svng zùngmà tiqgǿ kèní svkse yv́ngshì ráì wekvt welòng rvtnø̀ Professor Melissa Goldberg kaq Catholic shvngø̀mré mè ò dvrá, shvngøt dvtú we tvrà vléò we mvtaq vsv̀ng shvtwe tvrà svng nònggwòn ziwe bv̀nlì svng vtoò we lvjøm svng vpo we írvtnø̀ yadø bv̀nlì kèní nvr vdu bǿì we íe wanø̀ vtànvtnà.

Wedang nvng singnø̀ shvngø̀mré kèní shvngøt dvtú we dvrá rì mvjòdø dvdam shìwe nø vléshì we tvrà svng vpo dvzv́r we tvrà írvtnø̀ wedø íwe vsv̀ngrì kaq tvrà shvdøngā nø shvngøt dvtúǎ ràwe dang St. Aquinas taqkèní gø vtàn ráà we íe.

Professor Melessa Goldberg í Rachel Carbonneau kaq svng zùng koq vdòng svng dvgù:ngò nø̀ mòngkà tun dvzv́r we nvng Rachel Carbonneau taqkèní cv̀mré góng dvjá lv́m wawe tvrà rì nø Svmaré rì ò àngmaq rvcvngshì shvla we tvrà, shagóng shiqshv̀n tvrà dvpvt tubùmā we tvrà nvng lvpat shìlv́m dø írawe rvtø̀ taq wá vdu we tvrà íwe dang mòngkà kèní vtànò wegø íe.

We University ò shølshúpè taqkèní vtà:nò we taq shvngø̀mré ò dvrá kèní shvngøt dvtú we nø døngmvn we tvrà, kámnøt tvrà rì téwa gwaqlv́m, Catholic shvngø̀mré University taqkèní dvsháza shóngnøt rì svng vrangǎ lv́m, zitnøt, rv́lnøt rì banǎ lv́m, lvpat tvrà svng shvlá vtang cúnshì lúnlv́m nvng døngmvn tvrà svng tiqdá vsv̀ngrì kaq dvtit tvleā lúnlv́m dang manggá svng gv́lshì we íe wanø̀ vtà:nò we íe.